Hunermendê kurdan rixmê Korona goşdaranê xo bêmuzîk nêverdenê. Kerem Sevînçî vizêr şûmşîna xo de deyîrê xo vatî û bi rayîrê Instagramî resa heskerdoxanê xo. Mehmet Akbaş bi meymanê POPKURDî. Mîkaîl Aslan û Cemîl Qoçgîrî zî do siba konserêk bidê.
Nê rojanê ke şar rîyê vîrusê Korona de keyeyanê xo de heps bîyo hunermendê kurdan rixmê janî bi deyîranê xo yê zazakîyan benê meymanê keyeyan, moral danê û keyfê heskerdoxanê xo anê. Hunermend Kerem Sevînçî vizêr şûmşîne de deyîrê xo vatî û bi rayîrê Instagramî resa heskerdoxanê xo.
Konserê Sevînçî raştê eleqaya girde ame. Heskerdoxanê Sevînçî konserê şûmşîne sey resîtalê şûmsîne name kerd û waşt ke o nê konseran rê dewam bikero. Reyna Kerem Sevînçî ra ame waştene ke badê qedîyayîşê Korona wa semedê fîrazkerdişî reyna konsero wînayênî bido.
Reyna hunermend Mehmet Akbaş zî bi meymanê POPKURDî û derheqê hunerê xo û muzîkê zazakî de qisey kerd û tay lomeyê xo ardî ziwan. Akbaşî semedê temaşegeranê xo deyîra 'Husna' vate.
Hetê bînî ra Federasyonê Komeleyanê Dêrsimî (DEDEF) prosesê Korona de bi hunermendanê Dêrsimî û hîsgêrîyan her roje bi saeta welatî 21:00 konseranê keye de bimane organîze kena. Na çarçewe de 25ê nîsane (siba) zî do Mîkaîl Aslan û Cemîl Qoçgîrî Youtube ser ra konserêk bidê. Bi saeta welatî 21:00 de kanalê Youtube yê Mîkaîl Aslanî de konser do dest pê bikero.
