Newroze emser 89 merkezan de bi şîarê ''Rayberîya Azade, Komelo Demokratîk'' û ''Semedê Azadîye Newroza Komelê Demokratîkî'' do bêra fîrazkerdene. Amed de bi beşdarîya Hemserekanê DBPyî Çîgdeme Kiliçgun Uçar û Keskîn Bayindirî, Hemserekê Dem Partî Tuncer Bakirhanî û Vervatoxa TJA Hulya Alokmen deklarasyonê Newroze ame eşkerakerdene.

Deklarasyon de ame vatene ke Newroze seba kurdan yena manaya xoverdayîş, azadîye û newerabîyayîşî. Deklarasyon de bale ameye antene ke ser ke Rayber Apoyî 27ê sibate de Vengdayîşê Haştîye û Komelê Demokratîkî kerdo.

Deklarasyon wina dewam keno: ‘’Ma do karakterê azadîye yê Newroze û nê vengdayîşî tew bikerê. Newroza emserîne do biba wayîrvejîyayîşê îradeyê haştîye û azadîye yê Ocalanî. Rayberê Şaran seba caardişê haştîye mesuldarîye gêno xo milî. Seba ke Rayberê Şaran bi rehetî bixebito ganî şertê azadîya ey bêrê caardene.

Şorişê cinîyan û şaran bi felsefeya ‘Jin, Jiyan, Azadî’ adirê Newroze de har beno. Şorişê Rojawanî îsbatê ruhê azadîye yê Newroze yo. Seba ke nê destkewteyî bêrê pawitene û pîlkerdene ganî têkoşîn bêro pîlkerdene. 

Cewherê Newroze îradeyê pîyaciwîyayîşê şaran o. Newroze îradeyê cuya hempare yo. Şarê kurdî seba ke sîstemî birijno ganî yewîya xo bîyaro ca. Yewîya neteweya kurdan seba Rojhelatê Mîyanênî zî elzem a. Şarê kurdî do warê meydanan de ancî îradeyê caardişê yewîye bimojno.

Newroza 2025î do bikera ke xoverdayîş û azadîye pîl bibê, komelo demokratîk înşa bibo û têkoşîn aver şoro. Adirê Newroze bi ruhê yewîya neteweyîye, bi vengê seba azadîya Rayber Apoyî û seba mendebîyayîşê Şorişê Rojawanî bihêz bibê.

Ma Newroza Rayberê Şaran fîraz kenê. Ma venga cinî, ciwan, doman, kokiman û pêro şaran danê ke tewrê şayîyanê Newroze bibê ke Newroze cewherê têkoşînî yo. Vejîyê meydanan. Ma bi ruhê azadîye yê Newroze Newroza pêro şarê xo fîraz kenê. Newroze pîroz ba.’’

Îstanbul de zî bi şîarê ''Semedê Azadîye Newroza Komelê Demokratîkî'' deklarasyonê Newroze ke do 23ê adare de bêro fîrazkerdene, ame eşkerakerdene. Hemsereka Pêroyî ya DEM Partî Tulaye Hatimogullari û xeylê temsîlkarê partîyanê sîyasîyan û rêxistinanê komelê sîvîlî tewrê eşkerayîye bîye. Deklarasyon de ame vatene ke gerek Newroze de vengdayîşê Rayber Apoyî dahîna xurt bêro wayîrvejîyayene.