Kulturê dengbêjîye yo ke bingeyê kulturê kurdan o û rayberîya cinîyan de dest pêkerd, hema zî dewam keno. Dewa Aşûtê ya qezaya Çelê ya Colemêrgî ra Neslîhane Edîş (18) zî seba dengbêjîye namzet a. Neslîhane pê kilamanê xo tesîrê her kesî kena. 

Neslîhan qala eleqeyê xo yê seba dengbêjîye wina kena: ''Ez domanîya xo ra nata kilaman vana. Seba ke komelî rê eyb bi ke cinîyî kilaman vajê mi tim nimitkî kilamî goştarî kerdêne û vatêne. Mi qet keyeyê xo ra na mesele nêvate. Dima ke keyeyê mi pê hesîya paştî da mi. Wexto ke dibistane de mamostayanê mi zî wina vat ez hînî pê bawer bîya ke ganî ez kilaman vaja. Mi waşt ke ez rêçê Eyşe Şan û Meyreme Xan de şora. 

Verê cû wexto ke dadîyê ma pê çîyêk biqehirîyê yan zî serebûtêk biqewimo pê kilaman qala nînan kerdêne. Dengbêjîye seba ke tarîxê kurdan ra behs kena zaf girîng a. Dengbêjîye veng, qerayîş û xemginîya cinîyan a ke nêna eşnawitene. Coka sey cinîyanê ciwanan wezîfeyê ma yo ke ma wayîrê dengbejîye bivejîyê.''

 Neslîhane dana zanayene ke wexto ke dewe de kilaman vana her kes mat maneno û wina vana: ''Hema zî şar wina hesibneno ke dengbêjîye kulturê kokiman o. La ciwanî zî eşkenê bikerê. Ganî dengbêjê ciwanî weye bibê. Dengbêjîye sayê cinîyan heta ewro ameye. Eyşe Şan û Meyreme Xan zî meşaleyê nê kulturî yê. Ez sey cinîyêka ciwane wazena ke rêçê înan de şora û veng, serkewtiş û serebûtê cinîyan pê kilamanê xo bikirişa wextê ameyoxî.''