Huqûqnasê kurdî Alî Haso ke London de ciwîyeno, şaîrê kurdî Cemal Sureya û Ahmed Arîf kayê 'Ez bi rehetî nêmirena' de ardî yewca. Kaye de qala cu, dej, hîs û cigêrayîşê nasnameyî yê di şaîran yena kerdene.

Kay 3 rojan Salona Tîyatroyê Towerî de ame kaykerdene û eleqeyêko pîl dî. Kay de Goktay Tosun rolê Cemal Sureyayî, Cuneyt Yalaz zî rolê Ahmed Arifî anê ca. Dîrektorê kayî Nesîmî Kaygusuz o, muzîkê kayî zî Cansune Kuçukturk û Vedat Yildirim vitaşt.

Kay zereyê yew vagonî de pê raywanîya Sureya û Arîfî dest pêkeno. Na raywanîye heman wextî de bena yew têrîameyîş. Kay de qala serebûtanê ê çaxî yê Kurdîstanî, dormeyê çep û şorişgêrî zî yena kerdene.

Kay de Cemal Sureyayo ke keyeyê ci surgunanê Terteleyê Dêrsimî ra yew bi, kesayetê ci yê dejinî û nasnameyê ci yê asîmîlekerdeyî yeno vindeno. 

Nuştoxê kayî Alî Hasî da zanayene ke Arîf û Sureya embazê holî bîyî û vat: ''Uslubê înan ê nuştişî cîya bîyî zî mabênê cuyanê înan de yew paralelîye estbîye. Seba ke nasnameyê înan raştê teda ameybî qelema înan de ma eşkenê tesîrê ney bivinê. Nê wird şaîrî zî nasnameyê xo ra hetê sîstemî ra sey sûcdarî ameyî pênasekerdene. Ney zî înan de travmayêka pîle viraşte. Na hîkaye pers kena ke nê wird şaîran rixmê pêro teda û hesnêkerdişî zî şîîranê xo ruhêko xidar newe ra afernayo û bêedaletîya tarîxî ercnaya.''