Mîyanê 6 serranê peyênan de bi destê qeyûman hêrişê vera ziwan û kulturê kurdan yenê kerdene. Nê hêrişan reyde kayê bi kurdkî yenê qedexekerdene, vera merdimanê ke bi kurdkî qisey kenê hêrişê nîjadperestî yenê kerdene.

Dîrektor Veysî Altayî derheqê hêrişanê vera kultur, ziwan û hunerê kurdan de ANFyî rê qisey kerd. 

Altayî da zanayene ke ronayîşê Komara Tirkîya ra nata nê hêrişî dewam kenê labelê serranê peyênan de nê hêrişî zêdîyayî. Veysî Altayî îfade kerd ke dewleta tirke sîstemê xo çinkerdişê kultur û hunerê kurdan ser o awan kerdo, erjê kurdan zî kerdî malê xo.

Altayî vat: ''Eke ziwan, kultur û cografyaya yew netewe destî ra bêrê girewtene hînî a netewe çin bena. Na babete de kurdan zaf xo ver da û ziwanê xo de israr kerd labelê no qîm nêkeno. Ganî merdim xo rexne bikero. Ma çendek ziwanê xo de eleqedar benê? Dezgeh û sazgehê ma seba ke no ziwan ameyox de zêdêr bêro qiseykerdene çendek xîret kenê? Ez nê persan rê vana 'ney.' Verî her çîyî ganî ma wayîrê ziwan û kulturê xo vejîyê.''

Altayî pare kerd ke ganî verî komelê kurdan kurdkî ser o hesasîyetê xo bimojno û vat: ''Ge ge ma kombîyayîşanê xo yê ke bi seyan kesî tewrê ci benê, seba ke yew kes kurdkî nêzaneno tirkî kenê. Eke ma her warî de ziwanê xo teng bikerê, hînî ma zî do teng bibê. Eke ma ziwanê xo bipawê hînî hêrişî zî kêmîyenê. Qeyûman verî hêrişê tabelayanê bi kurdkî kerd. Coka her çî ra verî ma wayîrê ziwan û kulturê xo vejîyê. Ganî ma însafê şarî rê meverdê û metodanê pawitişê ziwan û kulturê xo peyda bikerê. Çunke eke ziwanê ma bi temamî ma ra bêro girewtene o çax têkoşîno polîtîk zî do kêm bimano.''