Endamê Merkezê Kultur û Hunerî yê Mihemed Şêxoyî Bengîn Elîyo ke nêweşîyêke ra astengdar bi, vat: ''Astengîya fîzîkîye qetî verê mi de nêbîye asteng.''

Bengîn Elîyo ke mîyanê Koma Botanî de ca gêno, dima ke 1985 de PKK şinasna cuya ci vurîyaye.

 Bengîno ke Qamişlo de dadîya xo ra bîyo wexto ke 6 serre bi wird linganê xo ra seqat mend. Bengînî 1985 de PKK şinasa, tewrê karanê sîyasî, leşkerî û kulturelan bi. Kombîyayîşêk de temburê destê embazanê ci bala ey anceno.

Bengînî wina qala ê kombîyayîşî kerde: ''Mi embazî ra waşt ke wa bimosno mi. La embazî vat ke tembur zehmet o. Ey dest pê dayîşê temburî kerd. Vengê temburî şibi Hozan Serhedî. Ey dûrî ra ma seyr kerdêne. Hozan Serhed ame û vat 'Eke ma eşkenê tembur bidê piro embaz Bengîn zî eşkeno. Kombîyayîşî ra dima Hozan Serhedî mi rê vat o eşkeno tembur bimusno mi. Ey temburê xo yo pîl da mi, notayê 'Bûkê Delalê' mojnayî û waşt ke ez bicena. Kombîyayîşê bînî de hînî ez musabi ke tembur senî cenîyeno. Wexto ke Hozan Serhedî no dî kêfê ci ame.''

Bengînî karanê PKKyî de bi aktîfî ca girewt, kincê gerîlayan deştî, karê cepheyî kerdî û şanan zî karê hunerî kerdî.

Bengîn dima tewrê karanê Koma Çiya bi. Bengînî vat: ''Tedayanê rejîmê Sûrîye ra ma karê xo mîyankî kerdêne. Bi giranî ma seba Roşanê Newroze amadekarîye kerdêne. Seba ke ma bi madî hetkarîya rêxistine bikerê, nimitkî veyveyan de cinitêne.''

Bengînî Koma Çiya ra dima Koma Çanda Şoreşê awan kerda. Bengînî dima zî bi dawetê Koma Botanî Koma Çanda Şoreşê tewrê Koma Botanî kerda. Nika o sey mesuldarê Koma Botanî xebitîyeno.

Keynayê Bengînî Evîne, Lawa, Êva û Hêvî zî karanê hunerî de eleqedar benê. Evîne babîyê xo reyde Koma Botanî de deyîran vana. Lawa koma govende de, Hêvî û Êva zî komanê domanan ê Merkezê Kultur û Hunerî yê Mihemed Şêxoyî de ca gênê. Bengîn vano ke o pê hunerê kênayanê xo kêfweş û sereberz o.