Bajarê Hamburgî yê Almanya de 12 serrî yo her serre Festîvala Fîlmanê Kurdan yena kerdene. Festîvala 12. do 28ê teşrîna verêne de dest pê bikero û heta 3ê teşrîna peyêne dewam bikero.

Festîval do 28ê teşrîna verêne de saete 18:00 de sînemayê Zeise de pê konserê Pervine Cakar û Ertan Metînî dest pê bikero. Dima ra do filmê Şevket Amîn Korkî ''The Exam'' yo ke xelate girewto  bêro ramojnayene. Rejîsor û serrolê fîmî Avan Jamal zî do akerdiş de cayê xo bîgiro û panelêk de cewab bido persanê mêmanan.

Mabenê 28ê teşrîna verêne û 3ê teşrîna peyêne de do sînemayanê 3001, Zeise û Tîyatroyê Mutî de çar leteyanê Kurdîstanî û Dîaspora ra 40î ra zafêr fîlmî bêrê ramojnayene ke mîyanê nînan de fîlmê namdar û wayîrê xelate zî estê.

Organîzatorî festîvala emserî rejîsor Rahîm Zahîbî rê dîyarî kenê û balê ancenê sînemayê Rojhilatê Kurdîstanî ser. Festîval de derheqê filmanê kurdan ê ke Îran de yenê viraştene û şertanê înan de zanayîş yeno dayene.

Çarçewa festîvalî de do aktîvîteyî bêrê kerdene. Şexsê namdarî, rejîsor û kaykerdoxê filman reyde do îmkanê qiseykerdişî bibo. Festîval do 3ê teşrîna peyêne de pê şayîyêke biqedîyo.

Programê Festîvala Fîlmanê Kurdan a Hamburgî pelê înternetî http://hkff.info/ ra yeno ramotene.