Dêrsim de Festîvala Kultur û Xoza ya Munzurî bi şîarê 'Vera talanê ocaxanê madenan ma xoza û cuye pawenê' vizêr Meydanê Seyîd Rizayî de ameye destpêkerdene. Festîvala ke do çar rojî dewam bikero, dezgehê elewîyan, partîyê sîyasîyî, rêxistinê komelê demokratîkî, temsîlkarê dezgeh û sazgehan a pîya xeylêk kesî tewrê ci bîyî.

Wekîla Partîya Çep a Keske Aytene Kordu û Şeradarê Dêrsimî Mehmet Fatih Maçogluyî akerdişê festîvale de qisey kerd. Maçoguluyî vat rixmê qedexeyan do festîvale tim bêro kerdene. Kordu vist vîrî ke festivale bi qedexeyan dest pêkerde û grûbê muzîkî bajarî ra ameyî vetene û vat: '' Vera nê zîhnîyetê qedexekerdişî ma bi têkoşînî heta ewro ameyî. Ma do ewro ra tepîya zî nê zîhnîyetî qebul mekerê.'' Kordu bale ante Qirkerdişê Êzidîyan ser û vat: ''Ma nê zîhnîyetî Qirkerdişê Dêrsimî, cinîyan ê vînîbîyayeyan ê Dêrsimî ra zanê. Tewr zaf cinîyê elîwîyan cinîyan ê êzidîyan fam kenê. Têkoşînê ma do tim dewam bikero.''

Badê akerdişê festîvale Kuçeyê Sanatî de binê sernameyê ''Elewîtîye û dewlete'' de panelêk ame kerdene. Temsîlkaranê rêxitinanê elewîyan ke panel de qisey kerd, ard ziwan ke dewlete kulturê elewîyan rê tehemul nêkena û vat gerek vera nê têkoşîno rêxistinkerde bêro kerdene.

Dima tîya panelê ''Erdlerz'' ame kerdene. Prof.Dr. Savaş Karabulutî vat Dêrsim semedê erdlerzî hazir nîyo. Qiseykerdoxanê bînan zî vist vîrî ke vera erdlerzî tedbîrê ke hewce kenê nînê girewtene û vat seba ke reyna dejê wina giranî merê antene gerek tedbîrî bêrê girewtene.

Saetanê şanî de Meydanê Seyîd Rizayî de konserî ameyî dayene. Ulaş Deli, Musa Baki, Erdal Erzincan, Mengene, Metin-Kemal Kahraman, Hakely Feat, Ensenble Cubafonica deyîrî vatî. Hunermendan bale ante muhîmîya pawitişê xoza ser.

Reyna çarçeweya festîvale de Pertagê Dêrsimî de konser ame organîzekerdene. Diyap Aga, Ozlem Biter, Hasan Ali, Grup Vardiya, Cem Erdost İleri, Mikail Aslan, Tara Mamedova, Cevdet Bagca û Baba Zula deyîrî vatî û bale ante talanê serê xoza.

Pulurê Dêrsimî de zî bi tewrbîyayîşê  Murat Akar, Serhat Şamdereli, Koroyê Venge Ma, Vedat Gündodu, Şirin Demirtaş, Ali Haydar Guçlu, Jara Çimen,Harun Gumuş û Zeynep Bakşi Karataş konser ame organîzkerdene.