Fîlmê Kobanê bi senaryoyê Medya Doz û Ozleme Yaşar yeno amadekerdene. Fîlm hetê Komunê Fîlman ê Rojawanî ra yeno amadekerdene. Doze û Yaşare dima ke şahîd û şerwananê xoverdayîşê Kobanê de qisey kerd senaryoyê xo nuşt. Fîlm Kobanê, Tebqa û cayanê bînan ê xoverdayîşî de ame girewtene.

Ozleme Yaşara ke dîrektorîya fîlmî zî kerde, derheqê amadekarî, antiş û prosesê post-produksîyonî yê fîlmî de ANFyî rê qisey kerd.

Yaşare da zanayene ke fîlm de bi taybetî cinîyan ê xoverdayoxan ser o ame vindertene û bale ante xoverdayîşê Kobanê ser. Yaşare vat: ''Kobanê de xoverdayîşêko bêhempa vejîya werte. Ma waşt nê xoverdayîşî bikerê fîlm. No fîlmê min o yewin o zî. Şar wextê xoverdayîşê Kobanê de herikîya uca coka fîlmê Kobanê kronojîk nîyo. Ma fîlmî ra verî şahîdan, şerwanan û şarî de qisey kerd. Ma senaryo goreyê nê qiseykerdişan nuşt.

Fîlm de Gelhat, Zehra (Fermandara YPJ), Ebû Leyla, Masîro karekterê sereke yê. Ma seba fîlmî setêko bîn nêviraşt, cayanê xoverdayîşî de fîlm ant. Şarê Kobanê ra nêbîyêne ma nêeşkayêne fîlmê xo biancê. Înan zaf hetkarîya ma kerde. Hetê bînî ra pêro kaykerdoxê fîlmî amator ê.  Domananê Kobanê zî hetkarîya ma kerde, înan ma rê mojna ke şerwanan ça de senî şer kerdo.''

Yaşare vist vîrî ke înan binê hêrişanê dewleta tirke de fîlm anto û vat: ''A raşte ma fîlm Serekanîyê de do biantêne la Tirkîya uca îşxal kerd. Ma fîlm taloq kerd. Wexto ke ma Kobanê de fîlm girewtêne Tirkîya hêrişê Kobanê kerdêne. Ma binê nê şert û mercan de 7 mengan de fîlm viraşt. Hetê bînî ra seke xoverdayîşê Kobanê de bi, xeylêk sînemagerê enternasyonalîstî tewrê nê fîlmî bîyî.''

Ozleme Yaşar kam a?

Ozleme Yaşar qezaya Sasonî ya Êlihî de serra 1981î de dadîya xo ra bîya. Aye dibistana verêne û mîyanêne Êlih de wende. Lîse de eleqeyê ci yê bi sînema dest pêkerd. Aye mîyanê komanê tîyatroyî de ca girewt, senaryoyê kayanê tîyatroyî nuştî û îdare kerdî. Aye şîîr, hîkaye û senaryoyî zî nuştî. Aye fîlmê ''Dema Jin Hez Bike'' yê Halîl Dagî de kay kerd û dîrektorîya fîlmê Berfîne kerde.