Başûrê Kurdîstanî de hişmendîya pederşahîye xurt a coka verê averşîyayîşê cinîyan yeno girewtene. Cinîyan ê ciwanan ê ressaman ê Kerkûkî derheqê babete de ANFyî rê qisey kerd. 

Lîsa Muweffeqa ressam vat: ''Qiseykerdişê komelî ma rê tesîrêkê xirabî kenê. Berhemê cinîyan nimite manenê, nêvejîyenê vernî. Ganî ma sey cinîyan ê ciwanan bi çêrî vejîyê verê komelî û marîfetanê xo bimojnê. Hunerê ma do bibo sebeb ke komel aver şoro. Ganî hetê wezîfedarî erkê xo bîyarê ca û rayîr mede cîyakerîya cînsîye. Ganî pêramotişê ma nêrê astengkerdene.''

Cinîya ciwane Şara Newzada resame vat: ''Ganî verî keyeyî dima zî komel paştî bidê cinîyan ê hunermendan. Heyf ke komel zêdêr hewesê cinîyan şikneno. Eke keyeyî paştî bidê domananê xo yê hunermendan cara komel nêeşkeno vengê xo bikero. Ez hêvî kena ke ameyox de şar zêdêr tewrê pêramotişanê cinîyan bibo û bi nê hawayî verê averşîyayîşê cinîyan ê hunermendan abibo.''

Leyla Ehmed vat: ''Keyeyê kurdî rayîr nêdanê ke domanê kênayî huner de eleqedar bibê. Kerkûk de zaf giranîye nêdîyena hunerî. Hişmendîya pederşahîye ya komelî verê cinîyan ê ciwanan ê hunermendan de asteng a, nêverdena cinîyî marîfetanê xo bimojnê. Ma wazenê zêdê paştdayîşo madî û manewî bêro dayene cinîyan ê ciwanan ê hunermendan.''