Mezopotamya cayê huner û awankerdişî yo. Rixmê şer û asîmîlasyonî zî heta nika warê hunerî de Mezopotamya rayberîye kena. Telkarî zî hunerêk o û rixmê asîmîlayonî pawîyeno. Hunerê telkarî kulturêko kahan ê suryanîyan o. Bi seserran o suryanîyî pisporîyê nê karî kenê. Sîmî ra goşera, bazin, tac, gerdenî, xirxal, xizême û sewbîna xeylêk berardişê bînan virazenê.  

Nika Mîdyad de tay westayê nê karî mendê. Xeylêk kesî bi nameyê, "Telkarî û çift" nê karî bi name kenê. Pisporanê nê karî ra yewe zî Munever Akbulut a. Munevere wextêkê dergî ra nata nê karî dir eleqedar bena û di serrî yo zî atolye akerda.

Munevere bale ante serê girîngîyê hunerê telkarî û wina vat: "No karêko qedîm o tîya yo. Yanî bi sedserran o hetê suryanîyan ra yeno pawitene. Ez kurmanc a, goreyê mi ganî ma sey hemparanê na herre kulturê yewbînan bipawê. No berpirsyarîyê ma pêroyînan ê. Ez zî sey cinîyêka ciwane nê karî bi heskerdişî kena. Heta nika zî sey pisporêke karê xo kena."

Wexto ke merdim keweno dikan; goşera, bazin, gerdenî û xeylêk tewirê bînî bale ancenê. Atolye de makîneyan de sîm senî yeno veşnayene û senî yeno kerdene. Munevere tacan zî virazena û pare kena ke viraştişê tacan sebr û kede wazeno.

Munevere vat ê xo resnenê her kesî û wina dewam kerd: "Semedê nexşê tenik û qijî zî karê ma sebir û kede wazeno. Nexş, çiqas tenik û qij bo tewr weşik beno. Ma tîya nexş kenê û dikanan de roşenê. Bi taybetî zî serê hesabê medyaya komelî ma rotiş kenê. Semedê ke ma xo bi resnê her kesî ma torra medya zî xebitnenê.'' 

Munevere tewr peyîn wina vat: "Ma sey cinîyan her tewir eşkenê payan ser o vinderê. Ma eşkenê her tewir kar bikerê. Goreyê mi tewr weş zî cinîyî kenê. Mi bi keda xo dikana xo awan kerde. Pêro cinîyê ciwanî eşkenê ney bikerê. Eynî wextî de kesê ke biwazê xo biresnê ma zî ma do kêfweş bibê."