Konserî roja yewşemeyî Solna Hallen de ame kerdene û bi deqayêkê rêzgirewtişî ra dima konserî bi marşê 'Ey Reqîbî' dest pêkerd.

Konser de ke hetê Golah Xizirî û Mahmûd Hame Taha Akeyrîyî ra ame pêşkêşkerdene, hunermend Xelîl Xemgîn qala semedê serûberkerdişê konserî kerde.

Xemgînî pare kerd ke hunermendê kurdî yê ke destpêkerdişê hêrişanê dewleta tirke yê vera Rojawanî de pîya kom bîyî, seba ke yewîya neteweyîye xurt bikerê kewtî mîyanê xîretêkê winasênî.

Xemgînî vat: ''Ma wazenê nê konseran Helebçe ra heta Kobanê serûber bikerê. Ma wazenê rêxistin û partîyanê pêroyînan tewrê nê karî bikerê.''

Xemgînî partî û rêxistinanê Kurdîstanî ra waşt kerd goş bidê vengê hunermendan û paştî bidê xîretê înan ê seba yewîya neteweyîye.

Dima hunermendî Mîhamed Taha Akreyî, Nasir Rezzazî, Narîn Feqe, Nejmeddîn Xulamî, Hesen Şerîf, Ayfer Duzdaş, Diyar Dersimî, Kejal Ademî, Hoshyar Hama Farag, Marîwan Safadîn û Şivan Perwer vejîyayî sehne ser û înan deyîrê xo yê bi kurdkî vatî.

Hemserekê Kongreya Neteweyîye ya Kurdîstanî (KNK) Ahmet Karamûşî zî konser de qisey kerd û îfade kerd ke armancê KNKyî caardişê yewîya neteweyîye ya kurdan o û 21 serr ê KNK seba naye têkoşîn keno.

Karamûşî seba xîretanê înan hunermendan rê sipas kerd û înan rê plaketî dayî.

Peynîya konserî de hunermendan pîya deyîrêke vate.