Pê paştdayîşê xeylêk weşanxaneyan û rêxistinanê komekê sivîlî Komelaya Cigêrayîşan ê Kurdkîyan de kampanyaya averberdiş, nuştiş û wendişê kurdkî dîyena destpêkerdene. Kampanya ewro Roşanê Ziwanê Kurdkî de do dest pêbikera.
Xeylêk weşanxane û rêxistinê komelê sivîlî vera asîmîlasyonê kurdkî ameyî têhet û înan bire daye ke kampanyaya averberdiş, nuştiş û wendişê kurdkî bidê destpêkerdene. Çarçewa kampanya de Komeleya Cigêrayîşan ê Kurdkîyan de kargehê kurdkî do bêrê akerdene. Nê kargehî do 4 mengan dewam bikerê. Kampanya ewro Roşanê Ziwanê Kurdkî de dest pêkena.
Hemsereka Komeleya Cigêrayîşan ê Kurdkîyan Lemane Elmas derheqê kampanya û xebatanê komele de qisey kerd.
Lemane Elmas da zanayene ke rîyê vîrusê Korona ra emser dersê kurmanckî, kirdkî û sorankî online yenê dayene. Elmase pare kerd ke neteweyanê cîyayan ra xeylêk kesî tewrê kursanê kurdkîyan ê înan benê. Elmase îfade kerd ke înan pê paştdayîşê weşanxane û rêxistinanê komelê bire daye ke kampanyaya averberdiş, nuştiş û wendişê kurdkî bidê destpêkerdene.
Elmase eşkera kerd ke kampanya 15ê gulane (ewro) do dest pêbikera û Roşanê Remezanî ra dima dersê bi çar hewteyan do dest pêbikerê. Elmase venga her kesî da ke tewrê nê dersan bibo û vat: ''Beşdarî eşkenê pê nê dersan kurdkîya xo aver berê, derheqê edebîyat û tarîxê kurdan de bibê wayîrê zanayîşan.''
Hetê bînî ra Elmase eşkera kerd ke aslê xo de ê her serre 15ê Gulane de Roşanê Ziwanê Kurdkî de wendekaranê asta mamostatîye rê sertîfîka danê ka emser rîyê vîrusê Korona ra wextêkê bînî de do pê merasîmêk nê sertîfîkayan bidê.
