Seyîd Riza û şeş embazê xi 15ê teşrîna peyêne ya 1937î de ameybî dardekerdene. Hemserekîya Konseya Rayberdişî ya KCKyî  serrgêra dardekerdişê înan de Seyîd Riza û embazê ci bi eşkerayîyêke, bi rêzî yad kerdî.

Eşkerayîye wina ya:

''Serrgêra dardekerdişê serkêşê xoverdayîşê Dêrsimî Seyîd Rizayî nêzdî bena. Ma Seyîd Riza û embazanê ey bi rêzî yad kenê. Ma şexsê înan de pêro qurbananê Terteleyê Dêrsimî yad kenê û hişmendîya qirkere şermezar kenê. Ma vanê ke têkoşînê şarê ma do hesabê pêro qirkerdişan biperso.

Qirkerdişanê tewr zalîman ê tarîxê merdimatîye ra yew zî Terteleyê Dêrsimî yo. Nê qirkerdişî de bi des hezaran merdimî ameyî qetilkerdene, domanî pîzeyê dadîyanê xo de ameyî kiştene. Çemê Munzurî bi gonîye herikîya. Coka Terteleyê Dêrsimî hişê şarê Kurdîstanî de bi sebebê dej û hêrsê pîlî. Terteleyê Dêrsimî vîrê şarê kurdî de cayê xo girewt û qetî do vîrî ra nêşoro.

Bêguman Terteleyê Dêrsimî çarçewa qirkerdişê kurdan de amebi kerdene. Dewleta tirke ya ke feraset û sîyasetê kolonyalîzmî kena, seba çinkerdişê  şarê kudî bi desan qirkerdişî kerdî. La heyf ke Terteleyê Dêrsimî mîyanê nînan de oyo tewr giran bi. Terteleyê Dêrsimî dişmenîya dewleta tirke ya vera kurdan eşkera kerde. Heta ke merdim Terteleyê Dêrsimî de têrî nêbo tarîxî raşt nêwaneno. Sere de ê Terteleyê Dêrsimî heta ke ma hesabê qirkerdişanê dewleta tirke nêpersê, ma nêeşkê erkê xo yê tarîxî bikerê, bibê wayîrê raştîye. Bêguman Têkoşînê Azadîye yê Kurdîstanî seba averberdişê hişmendîya azadîye, seba çinkerdişê hişmendîya qirkere û kolonyalîste û seba xelisnayîşê şarê Kurdîstanî do erkê xo bîyaro ca û mesuldaran ra hesab biperso. Têkoşînê ma yo ke bingeyê azadîya Kurdîstanî û demokratîkbîyayîşê Tirkîya û Rojhelatê Mîyanênî aver beno tarîxê azadîye newe ra nuseno.

Ma hişmendîya qirkere, kolonyalîste û îşxalkere şermezar kenê û şexsê Pîr Seyîd Riza û embazanê ey de pêro şehîdanê şorişî bi minet û rêzî yad kenê. Pîr Seyîd Rizayî sereyê xo verê dişmenî de nêard war, şarê Kurdîstanî rê mîrasê xoverdayîşî verda. Armancê ma yo sereke o yo ke ma nê vîrameyîşê biqîmetî bîyarê ca û şarê xo azad bikerê. Ma ancî soz danê ke ma do xo biresnê nê armancî. Ma verê vîrameyîş û têkoşînê Seyîd Rizayan de bi rêzî sereyê xo anê war.''