Komeleya Cigêrayîşanê Kurdkî wextê janê Korona de bi hawayêkê online ders da 3 hezar kesan. Kursî nika dewam kenê. Komele de asta yewîne, asta diyîne û hîrêyîne de înternetî sero dersê kirdkî û kirdaskî dîyenê. La dersê asta çarine û asta mamostatîye 2ê teşrîna verêne de bi hawayêkê têrîyî dest pêkerd. 25ê teşrîna verêne de zî semedê domanan kursê online dest pêkerd.

Hemserekê Komeleya Cigêrayîşanê Kurdkî Eyup Subaşiyî derheqê tedayanê vera kurdkî û xebatanê înan de qisey kerd.

Subaşiyî ard ziwan ke sey welatî ziwanê kurdan zî binê îşxalî de yo û vat: ''Ma binê îşxalî de yê û ziwanê ma binê tehlukeyêkê pîlî de yo. Eke ma ziwanê xo ra dûrî şorê ma kultur û estbîyayîşê xo ra zî cîya bibê. Dewlete sey verî hîna nêeşkena raşta raşt vaja ke kurdî çin ê la wazena kurdkî werte ra wedarna. Dewlete wazena hewcedarîya kurdan ya bi ziwanî bibirna la ma bi wayîrvejîyayîşê ziwanî cewabê ney danê.''

Subaşiyî vist vîrî ke înan wisar, hamnan û zimistan de dersê kurdkî danê û vat: ''Nê prosesê janî de 3 hezarî ra zêdêr kesî tewrê dersanê ma bîyî. Nika ma semedê domanan zî kursan danê. Ziwan semedê domanan zaf girîng o. Eke domanî nêeşkê bi ziwanê xo qisey bikerê o çax tehluke vejîyeno werte.''