Komîteya Kultur û Hunerî ya PKKyî derheqê hêrişanê nîjadperestan ê ''bêperwayan'' ê vera kultur û ziwanê kurdkî eşkerayîyêke daye. Eşkerayîya Komîte wina ya:

''Her roje hêrişê faşîzanî yê bêperwayî yenê kerdene. Ziwanê ma, kulturê ma estbîyayîşê ma yo. Bi seyan serran o ke şarê kurdî benê hedefê polîtîkaya înkarî û çinkerdişî. Deyîrê kurdkî bi hawayêkê nimitkeyî ameyêne goştarîkerdene. Hunermendanê kurdan ê rûmetênan bedelêko pîl da û hunerê ma aver berd. 

Sakarya de babî û lajêk seba ke kurdkî qisey kerdêne bîyî hedefê hêrişêkî û babî Kadîr Sakçi merd, laj Burhan Sakçi bi giranî birîndar bi. Antalya de Mahîr Çetîn zî heman semedî ra ame kiştene. Bariş Çakano ciwan zî Anqara de seba ke muzîkê kurdkî goştarî kerdêne kişîya. Nê serebûtanê pêroyînan de dewlete yan zî hêzanê ci yê paramîlîteran nê hêrişî kerdî. Pê destê qeyûman tabelaya Kitabxaneyê Celadet Elî Bedirxanî ameye wedaritene, sere de Heskîf pêro Kurdîstanî de awbendî virazîyayî ke tarîxê kurdan çinbo.  

Ma pêro zanenê û vînenê ke nê pêro hêrişî çimeyê xo tersî ra gênê. Nê hêrişî panîk û tersê dişmenan mojnenê. Şexsê ciwanê kurdî Bariş Çakarî de pêro hêrişê vera ziwan û kulturê ma pê şîarê 'Kultur û ziwanê ma estbîyayîşê ma yo' ma venga pêro şarê xo û dostanê ci kenê ke kom bibê û vera nê hêrişanê faşîzan yewîya şaran awan bikerê. Vera faşîzmî cepheyê xoverdayîşê hemparî yo yewparçe do ser bikewê.''