Komîteya Festîvala Fîlman a Silêmanî rixmo ke amebi dawetkerdene gala ra rojêke verî mojnayîşê fîlmê ''Ji Bo Azadiyê'' asteng kerd. Komîteya TEV-ÇANDî ya PKKyî bi eşkerayîyêke astengkerdişê fîlmî şermezar kerd. Eşkerayîye wina ya:

''Fîlmê 'Ji Bo Azadiyê' dawetê Festîvala Silêmanî ame kerdene la dima destpêkê festîvale ra verî dîya zanayene ke fîlm nêameyo qebulkerdene. Eşkera yo ke bahaneya qedexekerdişê fîlmî viraşte ya, sebebo raştikên sîyasî û madî yo. Pêro rayaumûmîya kurdan zanena ke peyê na bire de mudaxeleyê dewleta tirke ya kolonyalîste esto.

Di serrî verî zî dewleta tirke ya faşîste asteng kerd ke Silêmanî de sînemayan de fîlmê 'Ji Bo Azadiyê' bêro mojnayene. Silêmanî de ke pê edebîyat û hunerê xo namdar o, çîyo ke ameyo sereyê fîlmêkî ma xemgîn û hêrs keno. Dewleta tirke ya kolonyalîste dişmena kurdan a. A pê pêro îmkananê xo hêrişê kurdan kena û do bikera. La rewşa hemkaranê ci zî nêna qebulkerdene û famkerdene.

Çira dewleta tirke hêrişê nê fîlmî kena? Çunke no fîlm rîyê barbarî, qirkerî û bêwijdanî yê dewleta tirke eşkera keno. Rîyê dewleta tirke deşîfre keno. Nê fîlmî de qala têkoşînê xoverdayîşê xoîdarekerdişî yê kurdan yena kerdene. No fîlm qala xoverdayîş û çêranê nê xoverdayîşî keno. Coka dewleta tirke wazena her cayî de nê fîlmî asteng bikera.

La senî îzeh beno ke şaristanêkê kurdan de hetê kesanê ke xo sey Kurdîstanî pênase kenê ra, pê mudaxeleyê dewleta tirke no fîlm yeno astengkerdene? Hem wextê xoverdayîşê xoîdarekerdişî yê Vakurê Kurdîstanî de paştî nêdanê hem zî seba bêtehamulîya dişmenê hemparî nê fîlmê ê xoverdayîşî nêmojnenê! No çi pê hişmendîya neteweyîye îzeh beno?

Înan bi nê astengkerdişî mojna ke ê senî bêîrade, hemkar û wayîrê ruhê koletîye yê. Eke seba îmkananê madîyan û sebebanê sîyasîyan no tewir girewt o çax tehlukeyo bîn eşkera beno. No zî mojneno ke ê hêzî menfaatanê neteweyîyan ra çendek dûrî yê û senî bi hawayêkê asanî fikirîyenê.

Xoverdayîşo ke no fîlm qala ci keno, seba kurdan rûmet o û nika ra mîrasêko tarîxî û kulturkî yo. Coka pêro kurdê azadîgîrî ganî wayîrê nê xoverdayîşî û fîlmê ê xoverdayîşî vejîyê. Astengkerdişê nê fîlmî seba astengkerdoxan şerm o. Ganî serê nê şermî nêro girewtene. Wa rayaumûnîya kurdan vera nê tewirê hemkar û bêkarakterî tewirê xo bigêra û teşhîr bikera. Eke rayaumûmîya kurdan na babete de hîsger, rexnegîr biba ameyox de verê kerdişanê winasênan do bêro girewtene.

Ma reyna bi hêrsî tewirê ê kesanê ke 'Ji Bo Azadiyê' asteng kerdo şermezar kenê. Na bire hem kulturê kurdan rê hem zî dewaya kurdan rê zerar dana. Ma wazenê pêro rayaumûmîya demokratîke û şarê ma vera nê kerdişî hîsger bibê.''