Komeleya Kultur û Hunerî ya Dîcle û Komeleya Cigêrayîşanê Ziwanan û Kulturê Mezopotamya (MED-DER) seba domanan her kuçe û taxa Amedî de pîya xebatanê kultur, huner û ziwanî kenê. Komeleyî seba domanan kargehan virazenê, domanan reyde kay kenê û kurdkî musnenê. 

Perwerdekara Komeleya Dîcke Mizgîne Yildirim û mamostaya MED-DERî Seyhane Şaşmaz derheqê xebatanê înan de Jinnewsî rê qisey kerd. 

Mizgîne îfade kerd ke ê her qeza û dewa Amedî de xebatanê xo anê ca û vat: ''Armancê ma şiknayîşê pêlê asîmîlasyonîyo. ma prosesê Korona de tay mabên dabi xebatanê xo la ma newe ra dest pêkerd. Ma MED-DERî reyde projeyêko hempar kerd, domanan reyde ameyî pêser. Ma wazenê nê xebatan reyde domanan de hişmendîyêka newîye aver berê.Ma wazenê wa hayîya domanan pê kultur û ziwanê xo bê. Domanî zaf eleqe mojnenê xebatanê ma. No zî moralî dano ma. Domanî ça de bê ma zî do uca de bibê.'' 

Mamosta Seyhane zî bale ante ser ke ê alfabeya kurdkî musnenê domanan û vat: ''Keyeyî zî domananê xo reyde yenê. Nika ê zî tewrê xebatan benê. Domanî mekteban de bi tirkî perwerde benê û kurdkî ra dûrî visîyenê. Coka xebatê winasênî hem seba keyeyan hem zî seba domanan girîng ê.  Ma sey dîyarî qelem, setê perwerdeyê kurdkî danê domanan. Nika şertanê zimistanî ra ma tay mabên da xebatanê xo.''