Akademîya Ma Musicî ya ke dima ke 2016 de qeyûmî Konservatuarê Aram Tîgranî qefilnabi  ronîya bêmabên xebatanê xo rê dewam kena. Binê sîwana Ma musicî de Koroyê Cinîyan, Koroyê Domana, Orkestraya Ma û Orkestraya Rîtmê Xoza estê.

Ma Music do bi wesîleya serrgêra 4. ya ronayîşê xo 23-25-30ê çeleyî de 'Rojanê Muzîkî' serûber bikero.  Ma Music do nê bernameyî dîyarîya Egîdê Cimoyî bikero û sertîfîkayan bido kursîyeran.

Perwerdekaranê Ma Musicî ra Evîne Tîryakî derheqê babete de qisey kerd û ard ziwan ke tewr tay 70 kursîyerê înan estê. Evîne vat: ''Kursîyerê ma 3-4 serrî yo perwerde vînenê. Ma înan mezûn nêkenê, têna sertîfîka danê înan.  Cayê bîlurwan Egîdê Cimoyî muzîkê kurdan de cîya yo. Ma emser xebatanê xo dîyarîya ey kenê.  Akademîya Ma Musicî akademîyêka girîng a.  Ma do domanan reyde nê şaristanî bêmuzîkî meverdê. Konserê 'Rojanê Muzîkî' seba pêro şarê ma yo. Ma pabeyê her kesî yê.''