Xelatê Musabeqaya Şîîre û Hîkayeyan a Vateyî Amed de bi merasîmêkê hîrayî ameyî dayene wayîranê înan. Musabeqa hetê Grûba Xebate ya Vateyî ra yena serûberkerdene.

Merasîmê xelatdayîşî kuçeyê Hunerî yê qezaya Yenîşehîrî de bînaya Payîz Pirtûkî de ame kerdene. Endam û îdarekarê Grûba Xebate ya Vateyî, xeylêk hemwelatîyî û hunermendî tewrê merasîmî bîyî.

Muracatê musabeqa çend mengî verî dest pêkerdbî. Musabeqa de hîkayeyî hetê Pinare Yildiz û Denîz Gunduzî ra, şîîre zî hetê M. Malmîsanij û J. Îhsan Esparî ra ameyî ercnayene.

Merasîm de verî J. Îhsan Esparî qisey kerd û qala xebatanê Grûba Vateyî kerde. Dima hunermende Sasa Serap deyîrî vatî.

Dima nuştox Haydar Diljenî xelatê şîîran dayî. Beşê şîîran de şîîra Îdrîs Yazar xelata yewînîye girewte û şîîra Îrfan Sîmserkîsijî zî xelata diyînîye girewte. Îdrîs Yazar û Îrfan Sîmserkîsijî şîîrê xo yê ke xelatî girewtê wendî.

Verî ke xelatê hîkayeyan dîyayî hunermendî Sasa Serap û Celo Boluz reyna vejîyayî sehne ser û înan pîya deyîrî vatî. Dima nuştox û endamê Grûba Xebate ya Vateyî M. Selîm Uzunî xelatê hîkayeyan dayî.

Beşê hîkayeyan de hîkayeya Cumalî Karakuşî bîye yewine û hîkayeya Îrfan Akdagî zî bîye diyîne.

Merasîmê xelatdayîşî pê deyîran û sipasdarîye qedîya.