Meclîsê Federalî yê Swîsre bi zafîya rayan qirkerdişê êzidîyan qebul kerd. Vernîyaz de Konseya Federale ya Swîsre ra ame waştene ke seba tazmînatê sûcanê ke ameyê kerdene kampanyayêka mîyanneteweyîye wa bêra kerdene.
Parlamenterê Meclîsê Federalî yê Partîya Sosyalîste ya Swîsre Fabian Molane û Parlamentera Keskan Sîbele Arslan seba ke cînayetê DAÎŞî yê vera êzidîyan sey qirkerdiş-jenosîdî bêrê qebulkerdene vernîyazêk dabi Meclîsê Federalî yê Swîsre.
Molinayî roniştiş de pare kerd ke sûcê cerganê DAÎŞî yê vera êzidîyan çarçewa Peymana Vergirewtiş û Cezakerdişê Sûcanê Qirkerdişî de qirkerdiş ê. Molinayî vat: ''DAÎŞî êzidîyî qir kerdî, cinîyê êzidîyî kerdî kole û rotî. Nê sûcî pêro ameyî belgekerdene. Ez wazena ke parlamentoyî vernîyazê ma qebul bikero.''
Sîbele Arslan ard ziwan ke DAÎŞî asta jenosîde de êzidîyî qetil kerdê û vat: ''Neteweyanê Yewbîyayeyan (NY) no sey sûcî pênase kerdo. Xeylê dewletanê cîyayan cewabê ney da û venga NYyî da. Seba ke na barbarîye bêceza nêmana ma hetkar bibê.''
Qiseykerdişan ra dima bi 62 rayanê ney, 27 rayanê bêterefan û bi 105 rayanê heya vernîyaz ame qebulkerdene.
Vernîyaz de nê çîyî ameyî vatene:
''Dewleta Swîsre koçberkerdişê bi zorî, tecawuz, cînayetê sîstematîkî yê vera êzidîyan û wêrankerdişê îbadetxaneyan şermezar kerdî.
Dewleta Swîsre hêrişanê DAÎŞî yê 3yê tebaxa 2014î sey qirkerdişî qebul kena.
Seba tazmînatê sûcanê ke ameyê kerdene kampanyayêka mîyanneteweyîye wa bêra kerdene.''
