Nuştoxa kurde Gulgeşe Deryasipîya ke bi îdîaya ''endamîya rêxistine'' cezaya 6 serran û 3 aşman dîyayebî ci peynîya menga nîsane de roniştişê dewaya ci yê temyîzî esto.

Rêxistina  PENê Mîyanneteweyî  verê roniştişê Deryasipî eşkerayîyêke daye û waşt ke wa cezaya ci bêro wedaritene. PENî bale ante ser ke Deryasipî rîyê nuşteyanê xo yê derheqê ziwan û kulturê kurdî ra ameye hedefgirewtene vat coka ganî cezaya ci bêro vindarnayene.

Sazgehî endamanê xo  yê tirkan ra zî waşt ke wa semedê Deryasipî  meqamanê tirkî rê mesja bişawê û waşt ke Tirkîya de wa muhakemekerdişê vera  rojnamgeran û nuştoxan biqedîyo.

PENî waşt ke wa herêmanê kurdan de zî şîdet bêro vindarnayene û pêkewtişo ke dewam keno bêro çareserkerdene.