Cinîyanê Rojawanî bi Festîvala Edebîyat û Hunerî ya bi şîarê 'Cinîyî vilikê wisarî yê kulturî yê' 8ê Adare Roja Cinîyan ê Kedkaran a Dinya pêşwazî kerd. Cinîyanê herême eleqeyêko pîl mojna festîvale.

Festîvale bi hemkarîya Heyetê Kultur û Hunerî yê Herêma Cizîre, Komîteya Nuştoxan ê Cinîyan û Têgêrayîşê Hîlala Zêrîne Merkezê Kultur û Hunerî yê Mihemed Şêxoyî de di rojan ameye kerdene. 

Festîvale de bale ameye antene kultur, huner, pawitişê yewîye û paştdayîşê şaran de rolê cinîyan ser. Roja yewine ya festîvale de şehîdê Hesekê ameyî yadkerdene. Akerdişê festîvale de Endamê Komîteya Kulturî Botan Hoşerî qisey kerd. Tîyatro, şîîr û hîkayeyê bi kurdkî ameyî vatene. Şaîr û nuştoxan şîîr û hîkayeyê xo wendî. Koma muzîkî Gerê Stêrk vejîya sehne ser û govende ameye girewtene. Roja yewîne ya festîvale de fîlmê "Sarya", "Jiyana min tim şer bû" û "Mal" ameyî mojnayene.

Roja diyîne ya festîvale de tîyatro ame mojnayene, Koma Şehîd Lorîn vejîyaye sehne ser û deyîrê xo vatî. Peynîya festîvale de berhemê merasîmê xelatdayîşî ameyî dayene.

Endama Koma Tîyatroyî ya Hîlala Zêrîne ya Qamişloyî û Endama Koma Tîyatroyî Sara Baran qisey kerd. Înan pare kerd ke waşt neslanê neweyan rê kulturê xo bidê şinasnayene.