Festîvala Fîlmanê Kurdan a Hamburgî ya 12. pê şîarê 'Çar parçeyî, yew sînema' dest pêkerde. Çarçewa festîvale de 41 fîlmî do bêrê mojnayene. Festîvale pê fîlmê 'Ezmun'î yê dîrektorê Başûrî Şhawhat Amin Korkîyî dest pêkerde.

Promîyerê festîvale vizêr 18:00 de pê beşdarîya xeylêk dîrektor û heskerdoxanê sînema ame kerdene. Promîyer de hunermendî Pervîne Çakar û Etan Tekîn vejîyayî sehne ser. Festîvale dîyarîya dîrektorê Rojhelatê Kurdîstanî Rahîm Zahîbî û dîrektorê Başûrî Hakkar Abdulkadîrî ameye kerdene.

Promîyer de Endama Komîteya Amadekar Yaser Irmakî qisey kerd û îfade kerd ke 130 fîlman muracatê festîvale kerd la nînan ra 41 tenî ameyî weçînayene.

Dima fîlmê Ezmunî ame mojnayene ke qala bêusulîyanê hukmatê Başûrê Kurdîstanî keno. Dîrektor Şhawhat Amin Korkîyî dima cewab da persan û eşkera kerd ke babeta fîlmî serebûtê raştikênî ra yena.

Çarçewa festîvale de di panelî do bêrê kerdene. Panelo yewîn ewro bi babeta 'Çar parçeyan de Sînemaya Kurdan' 16.00 de Tîyatroyê Mutî de yo. Panel de Şhawkat Amin Korkî, Îbrahîm Şahîdî, Haşîm Aydemîr û Ekrem Heydo do qisey bikerê.

Panelê 'Eserê Tarîxî yê Texrîbkerdeyî yê Kurdîstanî' de arkeolog Mesut Alp do qisey bikero, panelê 'Kurdîstan de Vînîbîyayîşê Nasname û Xoza' de zî Veysî Atalay û reyna Mesut Alp do qisey bikerê.