Hunermendanê Merkezê Kulturî yê Mezopotamya (MKM) Rûkene Yilmaz eşkera kena ke muzîkê dinya agêrano kokê xo ser. Rûkene da zanayene ke muzîkê bi kurdkî rixmê polîtîkayanê asîmîlasyon, talan û çinkerdişî her tim xo aver beno.

Rûkene Yilmaz qala hîkayeya xo ya muzîkê kurdkî wina kena: ''Wexto ke mi dest pê muzîkê kurdkî kerd mi dejê asîmîlasyonî zêdêr hîs kerd. Mi ge ge deyîrê tradîsyonelî bi formê neweyî vurnayî. Hêverî mi muzîkê rockî kerd la dima mi hetê xo zivirna. Mi serra 2019î de albumê xo yê bi nameyê 'Tu Bihata' vet. Nika zî ez xebatanê akustîkan kena û albumêkê neweyî virazena.''

Rûkene persê 'Muzîkê bi kurdkî xo tekrar keno?' ser o no cewab dana: ''Eke deyîrî reyna bêrê vatene xo tekrar nêkenê aslê xo de xo newe kenê. Çunke her kes vatişanê cîyayan de cîya-cîya hîs keno. Ma ber anê la berhemê ma çendek resenê şarî? Ma eşkenê naye ser o nîqaş bikerê.  Muzîkê bi kurdkî kokê xo ra aver şino la xo tekar nêkeno. Êyê ke vanê muzîkê kurdkî nêno berardene wayîrê ziwanê nêheq û serdestî yê.

Sektorê muzîkî aslê xo de pîyasaya ci pîl a. La nê sîstemî bi serran muzîkê kurdkî nêgirewt zereyê xo. Armancê ma yo verêne pawitişê kulturê ma yo. Muzîkê bi kurdkî zî sey muzîkanê bînan kultur, tradîsyonê xo ra xo resneno. Goreyê mi muzîkê kurdkî zengîn o.''