Teda û zorbazîya vera kurdkî bi serran o dewam kena. Prosesê Korona de bi na bahane aktîvîteyê kultur û hunerî yê bi kurdkî ameyî qedexekerdene la ê bi tirkî ameyî caardene. Twr peyên Şaredarîya Mêrdînî kayê bi kurdkî qedexe kerd la destûr da ê tirkî. 2021 de bi taybetî zîndanan de 'qedexeyê vera kurdkî' rojdem de bîyî. Tepişteyan rê semedo ke bi kurdkî deyîrî vatî cezayî dîyayî. Ma xeberê Ajansê Mezopotamya, Rojnameyê Karinca û Susma24 ê serê qedexeyanê na serre kom kerdî.

2ê hezîrana 2021î - Vera bira Qeymeqamîya Gazîosmapaşayî ya ke kayê bi kurdkî 'Bêrû' qedexe kerdbi dewa ameye akerdene. Roniştişê dewa ame kerdene.

17ê hezîrana 2021î - Dewa de  waştişê vindarnayîşê bira qedexeyî ya serê 'Bêrû' ameye redkerdene. Mehkeme îdîa kerd ke 'TJN bi NÇM eleqedar o, NÇM zî bi PKK eleqedar o.'

7ê temmuza 2021î - Tîmanê Zabitayan ê Şaredarîya Beyogluyî yê Îsstanbulî destûr nêda ke muzîsyenî Kuçeyê Îstîklalî de bi kurdkî deyîran vajê. Zabitayan dest na hacetanê muzîkî yê muzîsyenan ser.

23ê tebaxa 2021î - Hemsereka verêne ya KCDyî û Wekîla verêne ya HDPyî Leyla Guven, Hemsereka HDPyî ya Amedî Hulya Alokmen Uyanik û Hetkara Sereka ESPyî Fethîye Çîçek zî tede vera 9 cinîyan  Zîndanê Xarpêtî de tehqîqat ame akerdeneç

31ê tebaxa 2021î - Tepişteyê Zîndanê Cinîyan ê Bakirkoyî seba ke bi kurdkî deyîrî vatî raştê tehqîqatî ameyî. Tepişteyan waşt ke bi kurdkî pawitişê xo bidê la ê ameyî astengkerdene.

16ê Êlula 2021î - Serdozgerîya Komare ya Êlihî derheqê 13 kesan de bi bahaneya ke 14ê tebaxa 2021î de mîtîng de deyîra 'Serhildan Jiyan e' vata û govende girewte tehqîqat da destpêkerdene.

5ê teşrîna verêne ya 2021î - Mehkeme cezaya zîndanî ya 2 serran daye Kadrî Pervane ke Amed de otobuse de bi vengê berzî muzîkê bi kurdkî goşdarî kerdêne.Bire de ame îdîakerdene le Pervaneyî 'propagandaya rêxistine' kerdêne û ceza 'binpaykerdişê heqanê merdiman' nîya.

13ê teşrîna verêne ya 2021î - Weşanxaneyê Avesta waşt Mêrdîn de nuştox Mîrza Metînî reyde edebîyatê kurdkî ser o bernameyê sohbetî bikero la bername bi bahaneya janî ame qedexekerdene. Naye ser o Avesta da zanayene ke înan bire daye le çalakîyanê xo yê Mêrdînî vindarnê.

16ê teşrîna verêne ya 2021î -Rixmo ke Walîtîya Îstanbulî destûr da çend seetî verî Qeymeqamîya Kadikoyî  şayîya serrgêra 30. ya ronayîşê NÇMyî qedexe kerde.

13ê Teşrîna peyêne ya 2021î - Muzîsyen û hunermendê NÇMyî Veysî Ermîş seba deyîra ke tede gerîla û Kurdîstan estbî îfade da û bi îdîaya 'propagandaya rêxistine' cenazaya zîndanî ya 6 mengan û 20 rojan dîyaye ci.

15ê teşrîna peyêne ya 2021î - Qeymeqamîya Fatîhî standupê bi kurdkî 'Dawiya Dawi' qedexe kerd.

16ê teşrîna peyêne ya 2021î - Şaredarîya Keçîorenî ya Anqara konserê Mem Araratî betal kerd.

5ê kanûna 2021î - Walîtîya Mêrdînî kayê bi kurdkî 'Tartufe' qedexe kerd.

Siba: Kedkaranê Merkezê Komelê Mezopotamya ra peykertraş Şahîn Dogan do tedaya vera kurdkî ser o qisey bikero.