Komunê Fîlman ê Rojawanî pare kerd ke mojnayîşê fîlmê 'Ji bo Azadiyê' Festîvala Fîlman a Silêmanî ya 5. de ame astengkerdene. Komunê Fîlman bi eşkerayîyêke vera îdareyê Festîvala Fîlman a Silêmanî nêrazîbîyayîşê xo mojna.

Eşkerayîye de ame vîrvistene ke 2019 de zî Asayîşê Silêmanî mojnayîşê fîlmî asteng kerdbi û fîlmê 'Ji bo Azadiyê' heta nika 20 festîvalan de ame mojnayene û xelatdayene. 

Komunî vat: ''Fîlmê 'Ji bo Azadiyê', Fîlmê 'Demê Dirîreşkan' û fîlmê 'Evîn di Rûyê Qirkirinê' bi vengdayîşê îdareyî tewrê festîvale bîyî. Fîlmê 'Evîn di Rûyê Qirkirinê' de seba ke Festîvala Fîlman a Dihokî de do biameyêne mojnayene bernameyê festîvale de ca nêgirewt la di fîlmê bînî bernameyî de ameyî cakerdene.

18ê kanûne de mojnayîşê fîlmê 'Ji bo Azadiyê' ra çend saetî verî bi hawayêkê fekkî bernameyê ma bi bahaneya ke 'fîlm 2019 de ame viraştene' ame betalkerdene.  La eşkera yo ke sebebê nê betalkerdişî cîya yo. Çunke;

-Ma muracatê festîvale nêkerd, festîvale venga ma da.

-Îdareyê festîvale zî zanayêne ke fîlm 2019 de ameyo viraştene.

-Muracatê fîlman de qala sînorkerdişê serre çinbî.

-Festîvale de fîlmê ke 2019 de virazîyayê estê.

Ma dima ard ziwan ke 'Girîng nîyo ke ma festîvale de ca bigêra la wa fîlm bêro mojnayene.' No nêame qebulkerdene. Coka kifş o ke 'teberî ra mudaxele esto.' Hetê bînî ra na festîvale de têna di fîlmî hem Kurdîstan de ameybî viraştene hem zî kurdkî bîyê: fîlmê 'Ji bo Azadiyê' û 'Demê Dirîreşkan.'

Ma sey Komunê Fîlman ê Rojawanî nê tewirê neetikî protesto kenê. Ma embazan û kedkaranê xo reyde babete nîqaş kerde. Netîce de ma bire daye ke seba ke na festîvale 'platformêko azad' nîyo ma do fîlmê xo 'Demê Dirîreşkan' zî nêmojnê.

Ma venga îdareyê festîvale danê ke derheqê betalkerdişê fîlmî de eşkerayîye bido rayaumûmîye.''