Têgêrayîşê Kultur û Hunerî (TEV-ÇAND) mabênê 21-28ê çeleyî de Herêmanê Pawitişî yê Medya de bi beşdarîya 93 delegeyan konferansê xo yo 7. kerd.

Netîceyê konferansî bi eşkerayîyêke ameyî parekerdene. Eşkerayîye de ame vatene ke Konferans de pespektîfê Abdullah Ocalanî, kultur û huner, mesajê Sekreterîya Pêroyî ya PKKyî, raporê karî, rojdemo sîyasî, têkoşîn de rolê kultur û hunerî ameyî nîqaşkerdene û xorexne-rexneyî ameyî dayene, plansazî û projeyî ameyî kerdene. Îdareyê TEV-ÇANDî ame weçînayene.

Netîcenameyê konferansî nê qerar û ercnayîşî estê:

-Çarçewa Hemleya 'Wextê Azadîye yo' de azadîya Rayberê Şarê Kurdî Abdullah Ocalanî do biba sebebo bingeyî yê têkoşînî.

-TEV-ÇENDî sere de şehîdê xo pêro şehîdî bi minetî yad kerdî, bire daye ke vîrameyîşanê şehîdan pê kultur û hunerî bipawo. Konferans de Şehîd Bager Nûjiya sey 'Sembolê Cuya Hempare ya Enternasyonalîste ya Şaran' Şehîd Têkoşer Ereb zî sey 'Hunermendê Rayberî yê Neteweya Demokratîke' ameyî qebulkerdene.

-TEV-ÇANDî ard ziwan ke Kurdîstan de pê destê dewlete kultur û ziwanê kurdan yeno çinkerdene û bi xurtî ra pare kerd ke vera îşxalker û kolonyalîstan warê hunerî de cewabê pîlî do bêrê dayene. TEV-ÇANDî venga pêro kadro, hunermend, edebîyatker û roşnvîran da ke wayîrê erjan vejîyê û pîya vera faşîzmî şer bikerê.

-Konferans de bingeyê tesbîtanê Rayberê Şarê Kurdî yê bi nameyê 'Binê tedaya qirkerdişê kulturelî de pawitişê kurdan' de girîngîya paştdayîşê kultur û hunerê Kurdîstanî ameye vîrvistene. TEVÇENDî pare kerd ke wa her kes seba kultur û hunerî bixebito û hunerê demokratîk û şorişgêrî aver bero.

-Bire dîyaye ke her cayê Kurdîstanî de warê neweyî yê kultur û hunerî bêrê akerdene û kultur û hunerê demokratîkî aver bero.

-Çarçewa karanê kultur û hunerî de plansazîyêka girînge ya çalakîyan ameye kerdene.

-Konferans de hîşmendîya popolîst û şexsîye ameye redkerdene û hîşmendîya kultur û hunerê demokratîkî ya alternatîfe û xebatê seba ci pêşkêş bîyî

-Konferans de nêzdîbîyayîş û ferasetê şaşî ameyî mehkumkerdene û bingeyê felsefeya Abdullah Ocalanî de çarçewa mana û girîngîya tarîxî ya têkoşînê kultur û hunerî reyna ameye îfadekerdene. Hetê bînî ra konferans de ame parekerdene ke dormeyê îdeolojîya xelisnayîşê cinîyan de warê kultur û hunerî de têkoşînêko aktîf û rêxistinbîyaye bêro kerdene.

-Netîcename de hêrişê AKP-MHPyî yê vera kurdan, xozaya Kurdîstanî sey hîşmendîya tecawuzkere ameyî nîşankerdene. TEV-ÇANDî seba pawitişê erjan venga pêro hunermend, roşnvîr, demokrat, cinî û merdiman da ke têkoşînê xopawitişî yê demokratîkî de bibê yew.

-Bire dîyaye ke vera her tewirê hêrişanê şerê taybetî, vera weşananê lerê taybetî yê ser bername û rêzefîlman têkoşînêko aktîf do bêro kerdene, pê karanê kultur û hunerî hêrişê winasênî bêrê pûçkerdene.

-Bire dîyaye hunermendan reyde bernameyî bêrê kerdene, muzîkê kurdkî ser o xebatê akademîk û perwerdeyî bêrê kerdene.

-Seba tîyatroyan karê akademîkî do bêrê kerdene, karê tîyatroyî bêrê zêdînayene û rêxistinkerdene.

-Bire dîyaye ke Erjê kulturel û folkolerîkî yê Kurdîstanî wa bêrê averberdene.

-Seba wayîrvejîyayîş, daşinasnayîşê hunermendan bernameyê yadkerdişî bêrê kerdene  û nê esasî ser o Konferanso 2. ê Kultur û Hunerê Neteweyî bêro kerdene.

-Peynî de venga pêro kedkaranê hunerî, hêzanê welatperweran û demokratîkan ame dayene ke vera hêzanê faşîstan mîyanê têkoşînî de wa bibê yew. TEV-ÇANDî vat: ''Konferansê ma bi hawayêkê serkewteyî qedîya.Şar û xebatkaranê kultur û hunerî rê fîraz bo.''