Veysî Toprako ke muzîkê kurdan ser o cigêrayîşan keno derheqê asîmîlasyonê vera muzîkê kurdan de ANFyî rê qisey kerd.

Toprakî bale ante ser ke muzîkê kurdan muzîkêko munhasir o û tesîrê muzîkanê neteweyanê bînan zî kerdo. Toprakî vat: ''Binê nameyê 'modernîte' de ganî unsurê xerîbî nêrê dekerdene mîyanê muzîkê kurdan. Serdestî zî bi nê hewayî û argumanî kenê ke muzîkê kurdan asîmîle bikerê û ruhê muzîkê ma çin bikerê. Muzîkê rojawanî (Ewropa) û muzîkê kurdan yewbînan ra cîya yê. Ganî her kes bi uslubê xo muzîkî virazo. 

Muzîk hîs û fikranê neteweyêke eşkera keno coka erkê muzîkî girîng o. Eke ma muzîkê xo bi unsuranê xerîban debikerê çîyo ke serdestî nêeşkayê bikerê, ma do bi destê xo bikerê. Muzîkê kurdan wayîrê dîsîplîn û tradîsyonê tarîxî yo. Ganî ma wayîrê erjanê xo vejîyê.

Ewro hîrê komî est ê ke binê nameyê 'fikrê pirrvengî' pawenê. Koma yewine bi temamî muzîkê xo teriknena û muzîkê Ewropa kena. Naye rê ma eşkenê vajê ke 'xo ra şermayena.' Koma diyîne hem sîstem û vengê muzîkê kurdan ra fek vera nêdana la hem zî xo aver nêbena. Koma peyêne unsuranê esasan rê zerar nêdana la îmkananê Ewropa yê teknîkan ra zî îstîfade kena. Muzîko ke nê hîrê komî virazenê kaos o. 

Ganî berhemêkê hunerî xo biresno eleqe, rindîye û estetîkî. Teyna bi yewê nînan nêbeno. Eke berhemêk reseno eleqe, rindî û estetîkî; eke goreyê erjanê neteweyîyan o û erjê ci yê hunerî est o o berhem girîng o.

Her kes bi muzîkê xo şad beno; modernîteya tewr pîle na ya. Ganî ma domananê xo rê teyna hacetanê populeran ê sey gîtar, pîyanoyî teşwîq nêkerê. Feraseto ke bi pîyanoyî kilama dengbêjan vano ganî tasfîye bibı yan zî perwerdeyê raştikênî bigêro.''