Komeleya Edebîyatkaranê Kurdan 2020 de Amed de ameye ronayene. Komela ke 15 bajaranê Kurdîstan û Tirkîya de temsîkarîye ci est ê, 100yî ra zafêr endamê ci est ê. Hemsereka Komeleya Edebîyatkaranê Kurdan Fatma Tunç derheqê armancê komele de qisey kerd.

Tunce ard ziwan ke armancê komele her hetî ra averberdişê edebîyatê kurdan o û vat, Semedê averberdişê edebîyatî  xora verî ziwan hewce keno. Yanî eke komel de wendiş-nuştişo bi ziwanê dayîke bizêdîyo edebîyatê o ziwanî zî vejîyeno vernî û nesîlî ra reseno nesîlê bînî. Ma tîya eşkenê bale biance çend çîyan ser.

Seba ke qiseykerdişê kurdkî bîyo tay, no serkewtişê polîtîkayanê asîmîlasyonî yê sîstemî nîyo. Vera nê sîstemî vejîyayîş zî zaf zehmet nîyo. Sîstem polîtîkayanê asîmîlasyonî domeneno. Çîyo muhîm o yo ke nê polîtîkayî bêrê teşhîrkerdene xebatê wayîrvejîyayîşê ziwanî bêrê kerdene. Eke xebatê winayên bêrê kerdene ziwanê dayîke her warî de beno vila û hûmara mektebanê edebîyatê kurdan zî zêdîyena.

Edebîyat û nuştoxî nîşanê nasnameyê xobîyayîşî danê. Bi nê rayîrê heqîqetî beno a. Akerdişê nê rayîrî, yanî têhetameyîşê nasname û heqîqetî mesele keno temam. Eke merdim mazlûm bo û vîrê ci yê neteweyî raştê hêrişî bêro, her kes çim verdeno hezîneyê ci. Çi hey ke kurdan na babete zaf dej ant. Cigêrayîşê ke ameyî kerdene û hema yenê kerdene de ma zanê ke nê delîl û belgehî vîrê kulturkî yê kurdan ra ameyî diznayene.”