Dengêjan kerd ke tarîx û edebîyatê kurdî ganî bimanê û heta ewro bêrê.Vengê cinîyan ê kurdan nê edebîyatê fekkîyî hîna weşêr keno. Deyîrbazîya cinîyan komelê kurdan de cayêkê taybetî gêno û zag girîng o. Na deyîrbazanê cinîyan ra yew zî Mizgîne Turan a.

Cinîya ciwane Mizgîne Turan 9 serran ra nata karê hunerî kena. Turane 12 serrîya xo de Akademîya Muzîkî ya Aram Tîgranî ya Şaredarîya Amedî de dest pê xebata muzîkî kena. Turane koroyê domanan de ca gêna. Dima ke Akademîya Aram Tîgranî hetê qeyûmî ra ameye padayene Turane Akademîya MA de xebatanê xo dewam kena. Turane nika zî Merkezê Kulturî yê Dîcle û Firatî de xebatanê xo yê hunerî kena. Turane vana Eyşe Şan û Fatma Îsa zaf tesîrê aye kerd.

Turane derheqê xebatanê xo de ajansê ma reyde qisey kerd la hêverî ma rê deyîrêke vate. Turana ke bi 9 serran o ke muzîkî reyde eleqedar bena vana: ''Sena mi muzîk yeno zaf manayan.  Muzîk seba mi hacetêkê têkoşînî û xoîfadekerdiş o. Coka deyîrî û kilamî kêfweşîye danê mi. Akademîya Aram Tîgranî de mamostayanê mi qirikê min ê dengbejîye perwerde kerd û zaf kede daye mi. 

Dengbêjîye huner û edebîyatê kurdan o kahan a. Kurdan kulturê xo bi dengbêjîya ardêne ziwan. Dengbêjan kerd ke edebîyat û tarîxê kurdan ganî bimanê.

Tarîxî ra heta ewro dengbêjanê cinîyan ê sey Eyşe Şan, Fatma Îsa, Meryeme Xan zaf zehmetîyî antî. Ez her wext nê cinîyanê têkoşeran û xoverdayoxan seba xo sey mîsal gêna. Eke nînan nê zehmetîyan ra derbaz nêbibîyêne û rayîrê ma anêkerdêne ma nika no huner wina azad nêkerdêne. Ma şagirtê înan ê.''