Nuştox Nezîr Oceko ke pê karanê xo yê bi kurdkî şinasîyeno derheqê kultur, ziwan û hunerê kurdan de ANFyî rê qisey kerd.

Nezîr Ocekî kitabanê xo Waneyên Rêzimana Kurmancî, Wêjeya Kurdî, Dîn û Mîtolojî û Destana Rustemê Zalî reyde xeylêk kitabê edebîyatê kurdkî zî nuştî, paştî daye xîretanê dezgehanê ziwanî yê sey Kurdî-Derî.

Ocekî vat: ''Heta ke ez weş biba ez do seba kurdkî karê xo rê dewam bikera. Wextê şaredarîyanê ma de seba kurdkî xeylêk karî ameyêne kerdene. Dima dewlete dest na dezgehanê kurdan ser, qeyûmî tayîn kerdî. Herinda dezgehanê ma de dezgehê xo awan kerdî, dest pê xebitnayîşê dînî kerd. Dewlete bi taybetî seba asîmîlekerdişê domananê kurdan xîret kena. Kurd, ereb û tirkî xîret kenê ke kurdan asîmîle bikerê. Vera asîmîlasyonî ganî roşnvîr, nuştox û hunermendê kurdî seba averberdişê edebîyat û ziwanê kurdkî zêdêr bixebitê, kede bidê.''

Ocekî venga pêro kurdan da û vat: ''Şarê kurdî ganî wayîrê ziwanê xo vejîyo, her ca de, kuçe, keye û taxan de bi kurdkî qisey bikerê. Domanê ma yê ke ameyoxê ziwan û kulturê ma yê, hêdî hêdî mîyanê kultur û ziwanê cîyayî de pîl benê. Ganî ma domananê xo pê estanikanê kurdkî pîl bikerê. Ganî ma wayîrê domananê xo vejîyê. Ganî pêro kurdî keyeyê xo bikerê dibistanêke, bi kurdkî qisey bikerê û bi kulturê xo biciwîyê.''