Jîyargeyê Fatma Ana yê Gelîya Munzurî de hetê Wekîlê CHPyî yê Xarpêtî Gursel Erolî ra binê nameyê 'xebata peyzajî' de tay vurîyayîşî ameyî kerdene. Jîyarge de di peykerê şêran ronîyayî û dêsî virazîyayî. Erolî 28ê teşrîna verêne de jîyarge 'akerd' û jîyarge de tabelaya 'hetê Erolî ra virazîya' daliqnaye.

Serekê Merkezê Cigêrayîşanê Dêrsimî (DAM)  Selman Yeşîlgozî derheqê babete de Ajansê Mezopotamya rê qisey kerd.

Yeşîlgozî pare kerd ke Dêrsim de xeylêk cayî hetê kesanê sey Erolî ra ameyî texrîbkerdene û vat: ''Binê nameyê restarasyonî de cayê fîrazî yenê xeripnayene. Nê merdimî vanê qey nê cayî aîdê înan ê. No vera jîyargeyanê ma bêhûrmetî ya. Ganî xebatî awanîya xozayîye nêvurnê û sey malzemeyê reklamî nêşuxilîyê. Gursel Erol Duzgin Babab, Buyuk Çeşme heman çî kerd. Merdimî zî ey xo rê numûne gênê. Tay sîyasetmedarî cayanê ma yê fîrazan sey malzemeyê reklamî şuxilnenê. Ganî dezgehê ma yê bawerîye verê ney bigêrê.'' 

Yeşîlgozî vist vîrî ke cayê fîrazî hêdî hêdî yenê kerdene cayê 'turîstîkî' û vat: ''Ma senî ke xebata Çimeyanê Munzurî raşt nêvînenê ney zî raşt nêvînenê.  Çunke no kerdiş cayanê ma yê fîrazan keno gemarin. Ez venga selahîyetdaran dana ke panoyanê reklamî cade wedarnê.''