Dêrsim de çarçewa Festîvala Kultur û Xoza ya Dêrsimî de Kuçeyê Hunerî de aktîvîteya 'Cinîyî hê qisey kenê' ameye kerdene. Wekîla Partîya Çep a Keske ya Dêrsimî Aytene Kordu zî aktîvîte de qisey kerd. 

Aytene Kordu da zanayene ke cinîyî hertim raştê şîdetî yenê û waranê cuye ra yenê teberkerdene. Aytene Kordu vat: ''Îqtîdarê AKP-MHPyî de qirkerdişê cinîyan yeno kerdene. Bi taybetî zereyê keyeyî de şîdet zêdîyayo. Ganî ma nê şîdetî teşhîr bikerê û vera şîdetî ganî vengê xo hîna zaf berz bikerê. Her ke faşîzm zêdîyeno şîdet, tacîz û tecawuzê vera cinîyan zî zêdîyeno. Ganî bi taybetî Dêrsim de cinîyî bieşkê cayanê xoseran de meseleyanê xo ser o qisey bikerê û têkoşînê hemparî bikerê.''

Rojnamegere Ceylane Ulgen zî aktîvîte de qisey kerd û bale ante serebûtanê Gulîstane Doku û Îpeke Er ser. Ulgene vat: ''Dewlete vera cinîyan polîtîkayanê qirkerdişî ana ca. Ganî na babete de ma xo rê Şorişê Rojawanî nimûne bigêrê. Çareserîye şorişê cinîyan o.''