Nîgarferhengo ke bi kirdkî û kurmanckî ameyo hedrekerdene, hetê Weşanxaneyê Morîyî weşanîya.

Kirdkîya nîgarferhengî hetê Uxur Sermîyanî ra ameye hedrekerdene. Nîgarferheng 64 beşan ra yeno pê. Tedeyîya nîgarferhengî hîra û reng bi reng a. Uxur Sermîyanî wexto ke çekuyê nîgarferhengî weçînayê, dîqetê xo dayo serê meseleyanê muhîman. Çekuyê ke kirdkîya ferhengî de ca gênê fekanê cîya-cîya minqiqayanê kirdan ra ameyê weçînayene. Ney zî nîgarferheng kerd hîra û dewlemend. Reyna çekuyê kirdkî goreyê cinsîyetanê xo ameyî dîyarkerdene. No xususîyet zî musayîş û perwerdeyî asan keno. Reyna qismê tedeyî de  derheqê çekuyanê kirdkî de malûmatê bingeyinî yenê dayene. Nîgarê (Resimê) ferhengî zî hetê Ercan Altuntaşî ra ameyî hêzkerdene.

Serranê peyênan de musayîşê kurdkî rê eleqayêko pîl esto. Dersê kurdkî hem kursanê taybetan de hem zî mektebanê dewlete de yene dayene. La perwerdeyê kurdkî de kêmanîya materyalanê perwerdeyî esta. No nîgarferhengê bi kirdkî û kurmanckî do seba mamosteyanê kurdkî bibo hetkarêko pîl.