Dima ke qeyûmê îşxalkerî Sînemaya Yilmaz Guneyî ya Şaredarîya Êlihî rijnaye ci ra komêke Êlih de serra 2018î de Yeni Sahne awan kerde. Mîyanê na kome de têna Erdal Kaya wayîrê perwerdeyê tîyatroyî yo. Ê bînî mamosta, avûkat, xebatkarê weşîye yê. Yeni Sahne de zafêr kayê bi kurdkî yenê kerdene.

Erdal Kayayî zanîngeh de perwerdeyîya tîyatroyî girewte. Yeni Sahne de nika 150 kaykerdoxî estê û nê kesî pê îmkananê xo kayan kay kenê.

Kayayî vat: ''Yeni Sahne vengîyêke dekena.  Wexto ke ma tîya kerde a kayê ma çinbi. Amed, Îstabul û Wanî ra komê tîyatroyî ameyêne. Kayanê ma fikrê 'Ma kayê bi kurdkî seyr kenê la tira çîyêk fam nêkenê' wedarit. Tîyatroyê bi kurdkî cara hîşê kurdan de esto. Êyê ke bi kurdkî tîyatro kenê xo resnenê xeylêk merdiman. Verê cû wexto ke kurdkî ameyêne vatene ziwan sey bendêkî ameyêne dîyene. Amed, Êlih û Wan de hîşmendîyêka winasêne estbî la ma na şiknaye.''

Kayayî ard ziwan ke ê nêeşkenê ke xo polîtîkayanê rojaneyan ra dûrî bigêrê û vat: ''Eke ti bi ziwanê xo tîyaro kenî her çend vajî 'ez sereyê xo pê çîyêk nêdejna' nêeşkenî muxalîfbîyayîşî ra dûrî vindero. Tîyatro bi zo muxalefet o. Ma asîmîlasyon kerd hedef. ''

Kayayî da zanayene ke ê bi kayê 'Şildim Bildim' nê prosesê pandemîye de  xîret kenê ke vengîya nikayêne debikerê. Înan heta nika 12 beşî girewtî û êlule de zî reyna dest pê girewtişî bikerê.