6ê kanûne de dewa Mûşîyanî ya qezaya Tutaxî ya Agirî de Murat Kaya yo ke babîyê 3 domanan o sereştişê keyeyê ci de amebi qetilkerdene û vizêr zî ame definkerdene. Dadîya Kayayî Dîlber Kaya û birayanê ci derheqê serebûtî de qisey kerd. Dêsanê zaf keyeyanê dewe ser o rêçê guleyan estî û keyeyo ke Murat Kaya sey birîndar rema û şi ci ser o zî bombaya destî amebî eştene. Keye de bomba ra sebeb taxrîbatêko pîl ame meydan û dêsan ser o hema zî gonî esta.

Dadîye Dîlber Kaya vat: "O serê sibayî Muratî waşt ke şoro teber. Mi va meşo la vat ke 'Dormeyê keyeyê Fettahî girewt ez şora biewna ci. Çira mi rê çîyêk bikê ke' Murat hetê leşkeran de bi. Mi venga ci da la mi rê va ke şore zere. Dima leşkerêk ame û vat Murat puncan û qazax wazeno. Heta ke mi ê ardî leşker şibi. Lajê mi babîyê 3 domanan bi û terefgîrê PKKyî nêbi. Ez do siba her ca de naye vaja. Lajê mi rê vanê terorîst ke sucê xo binimnê. Her kes pêro dewe zaneno ke lajê mi derdê debarê xo de bi. Seba ke lajê mi şi uca o kişt. Gune û sucêkê lajê mi çinbi."

Birayê Murat Kayayî Fettah Kaya yo ke pêkewtişî ra dima bi îşkenceyan qasê 3 rojan ame destbendkerdene vat: "6ê kanûne de serê sibayî leşkeran bi desan wesayîtanê zirxînan dormeyê dewe girewt. Cemal Aksoy hetê leşkeran de bi ez zî şîya uca. Leşkeran persa ke dewe de kesêk esto yan ney. Cemalî vat xebera ci pê çin a. Wexto ke vengê çekan ame ma kerd ke biremî la leşkeran nêverda. Leşkeran da ma ro. Waştêne ke bi wesayîtê zirxînî ma ser o şorê. Pêkewtiş ra dima leşkeran Cemal berd û dima mi dî ke Cemal mîyanê gonî de yo. Leşkeran 4 saete ma mîyanê vewre de rîser verda û kuwayî. Mi nêzanayêne birayê mi kişt. Têna leşkeran vat sivîlêk merd. Key ez şîya qeraqol mi rê va ke birayê mi lîngê xo ra birîndar bîyo. Dima ez musa ke merdo. Sereyê mi çend cayan ra şikit. Wextê îfadeyan de avûkatêk çinêbi. Birayê mi Murat Kaya sivîl bi. Seba ke meraq kerd çi qewimîyeno ame uca."

Birayê Murat Kayayî Maksut Kayayî zî derheqê qetilkerdişî de nê çîyî vatî: "Verî ke pêkewtiş hema dest pênêkerdbi Murat hetê leşkeran de bi. Pêkewtiş ra dima qerqilîyeno û keno ke biremo û yeno padayene. Dima şino keyeyê cîranê ma. La dewam kenê ke keye ro guleyî nanê pa. Înan birayê mi vist halêk ke rîyê ey nêameyêne şinasnayene. Leşkeran îdîa kerd ke birayê mi bomba eşte. Birayê mi bomba bivîno zî nêşinasneno. Ez tîya ra venga her kesî dana ke birayê mi sivîlêk bi û hetê leşkeran ra ame kiştene, wekîlê HDPyî û CHPyî bêrê wa ney ser o cigêrayîş bikê."