Fûarê Kitaban ê 7'in ê Amedî hetê TUYAP‘î ra yeno viraştene Merkezê Kongre û Fûarî de ame destpêkerdene. Xeylî nuştoxî, rêxistinê sivîlî yê şaristanî û odeyê karî tewrê akerdişî bîyî.

Serekê Yewîya Weşangeran a Tirkîya Kenan Kocaturkî akerdiş de qisey kerd û vat: "Şima xêr ameyî, ez şima pêroyî dawetê Fûarî kena. Par û emser seba ma wextêko zor bi. Nê zehmetîye ardî ma vîrî ke ganî weşangerîye sey xizmetê umûmîya bêra qebulkerdene û seba ke cuya kulturî bikera dewlemend ganî weşangerîye bêra paştdayene." Kocaturk bale ante ke wendişê kitaban kêmî bîyo û derheqê kitabanê ke ameyî qedexekerdene de zî vat ke; nê têgêrayîşî 12'ê Êlule ra mendî û ganî nê bêrê caverdayene."

Wendox û Nuştoxî Do Bêrê Têhet

Fûar do 9 rojî dewam bikero û fûar de 75 aktîvîteyê kulturî do bêrê kerdene ke panelî, kargehî, qiseykerdişî û aktîvîteyê domanî înan ra yê. Aktîvîteyan û rojanê îmzeyî de nuştox û wendoxî do bêrê têhet. Tayê nuştoxî, xêzker û şaîrî sey, Migirdaç Margosyan, Ahmet Tellî, Altan Oymen, Aytul Akala, Hasan Ali Toptaş, Îsmaîl Saymaz, Latife Tekîn, Bahadir Yenîşehîrlîoglu, Murat Menteş, Feryal Saygiligîl, Kemal Hamamcioglu, Ferîde Çetîn, Lal Laleş, Bîrsen Ekim Ozene, Sînan Yagmur, Jaklîn Çelik, Şener Ozmen, Seray Şahinere, Selçuk Erdem, Kemal Varol, Ayşe Hure, Şeyhmus Dîken, Berken Bereh, Gaye Boralioglu, Murat Ozyaşar, Celîlê Celîl, Erdogan Aydin, Toprak Işik, Gulseren Budayicioglu, Selîm Temo do tewrê fuarî bibê.