Keyeyê Temîzerî tengîya madîye ra 11 serrî verê cû keyeyê xo hewilneno Îstanbul. Mehmet Temîzer zî mekteb war verdeno û xebitîyeno. Mehmet Temîzer Îstanbul de tewrê xebetanê ciwanan beno, çend reyî yeno destbendkerdene û rîyê tedaya dewlete ra serra 2014î de agêreno Nisêbîn.  

Mehmet Temîzer qezaya Nisêbînî ya Mêrdînî de wextê qedexeyê tebervejîyayîşî de ame kiştene. Keyeyê Temîzerî 5 serran ra nata gêreno cenazaya ci. Dayîke Sakîne Yildirim xeberan ra musena ke lajê ci dinyaya xo bedilnaya û seba ke cenaza bigêra qedexeyî ra dima şina Nisêbîn. La rixmê pêro muracatan zî nêeşkena netîceyêke bigêra.

Sakîne Yildirim numuneya DNA daye Serdozgerîya Komare ya Mêrdînî û bi serran o ke pabeyê netîce ya. Tewr peyêne Sakîne Serdozgerê Mêrdînî reyde qisey kerd. Serdozgerî ci rê vat: ''Ti şo. Cenaza key eşkera biba ma do bidê to. La beno ke 10 serran yan zî 20 serran ra dima eşkera biba.'' 

Dayîke Sakîne her ke şina Nisêbîn kuçeyan de gêrena cenazaya lajê xo. Dayîke Sakîne vana: ''Heta ke ez cenazaya xo bivîna gêrena ci. Sey ma zaf keyeyî estê. Ê zî gêrenê cenazaya xo. Hînî ma rê nê zulmî mekerê û cenazayanê ma bidê ma. Lajê mi sûcêk nêkerd têna erdê xo, şarê xo û xo pawit. Çewî rê zulm nêkerd. Qet yew cayê dinya de sey tîya cenazayî nênê cezakerdene.''

Dayîke Sakîne vist vîrî ke wextê qedexeyê tebervejîyayîşî yê Cizîre, Nisêbîn û Sûrî e xeylêk kesî ameyî qetilkerdene û vat: ''Ma her tim venga partî û dezgehan kenê. La ma netîce nêgenê. Hînî ez nêzanena ke se bikera. Wa esteyanê lajê mi bidê mi. Mi o nêdî wa ez hesteyanê ci bivîna.''