Gerîlaya YJA Starî Mercane Erkol (Berîtan Tolhildan) a ke di serrî cuwa ver Amed de pêkewtişêk de şehîde bîye 9 aşmî yo nasnameyê ci eşkera bîyo la seba ke gorê aye de leteyê hîrê meyîtan estê merdimê ci rixmê heme muracatan nêeşkenê cenazeya xo bigêrê.
Gerîlaya YJA Starî Mercane Erkol (Berîtan Tolhildan) 16ê teşrîna verêne ya 2017î de qezaya Pasûrî ya Amedî de pêkewtişêk de şehîde bîye. Nasnameyê Erkole 17ê adara 2019î de ame eşkerakerdene. A roje ra nata 9 aşmî yo keyeyê ci semedê girewtişê cenazaya kênaya xo têkoşîn keno.
Badê xeylêk muracatan û viraştişê testê DNA ke 4 aşmî domyenê, babîyê Erkole Hesîn Erkolî ra yeno vatene ke o eşkeno Goristanê Yenîkoyî ra cenazaya kênaya xo bîgêro. Babî Erkolo ke şino goristan ci rê yeno vatene ke bi sebebo ke goro ke sey gorê kênaya ci yeno mojnayene de meyîtê hîrê kesanê letekerdeyan estê, o nêeşkeno cenaze bîgêro.
Babî Erkolo ke agêreno Wan ûca muracatê Komeleya Heqanê Merdiman (ÎHD) keno. Rixmê heme muracatan derheqê babete de averşîyayîşêk nêbeno. Babî Hesîn Erkol 22ê kanûna 2019î de reyna şino Amed û bi avûkatanê xo rêyna muracatê Serdozgerîya Komare ya Amedî keno. Pêvînayîşê avûkatî de dîyeno zanayene ke hema cînsîyetê cenazeyan bewlî nêbîyo. Rixmo ke DNA ya Mercan Erkole ameye viraştene bi bahaneyê ‘‘cînsîyet bewlî nêbîyo‘‘ cenazaya ci nêdîyena keyeyê ci.
