Îqtîdarê AKP-MHPyî yo ke tewr peyên dest nayo şaredarîya Miksî ser, seba destnayîşanê neweyan gêreno bahaneyan. Wekîlê DEM Partî yê Wanî  Sînan Çîftyurekî derheqê babete de qisey kerd. 

Çîftyurekî pare kerd ke bi tayînkerdişê qeyûman hem hemşaredarî hem zî şar yenê cezakerdene. Çîftyurekî dîyar kerd ke îqtîdar goş nêdano îradeyê şarî, bi hawayêkê nehuqûqîyî qeyûman tayîn keno.

Çîftyurekî vist vîrî ke vera Hemşaredarê Miksî Ayvaz Hazirî 9 serrî verî dewa amebî akerdene la qaşo dewa amebî vindarnayene. Çîfyurekî vat: ''Çend mengî weçînayîşan ra verî dosyaya dewa ameye akerdene û mehkeme hêverî ceza daye, na zî bîya bahaneya tayînê qeyûman. Dosyaya dewa îstînaf de ya, prosesê mehkemeya berze de ya.''

Çîftyurekî da zanayene ke îqtîdarê AKP-MHPyî teber û zere de îradeyê şarê kurdî nêşinasneno û vat: ''Îqtîdar mengêke qalê haştîye, çareserîye, hemkarî û nermîye kerdêne. Bahçelî û Erdogan vanê ke ê haştîye wazenê. La qeyûman tayîn kenê û hêrişê Rojawanî kenê. No yew konseptê şerî yo. No tewir do bi şarê kurdî û bi pêro şaran bido binvistene.''