Nika bala pêro dinya şerê Ukrayna û Rûsya ser de ya. Pêro dinya yew fekî ra sûcanê şerî yê Rûsya şermezar kena û paştî dana Ukrayna. 

La nê şerî ra 4 serrî verî dewleta tirke hêrişê şaristanê Efrînî yê Rojawanî kerd. Ne Amerîka, Yewîya Ewropa ne zî NATOyî vera nê hêrişan vengê xo kerd. Efrinîjan 58 rojan vera nê îşxalî xo ver da. 58 rojan de dewleta tirke û cerganê ci Efrîn de 500 sivîlî qetil kerdî.

Hêrişanê giranan ê 15-16ê adara 2018î ra dima şar neçare mend ke koç bikero. 16e adare de serrgêra Qirkerdişê Helebçe de Efrîn de 16ê ci domanî, 14ê ci cinîyî 47 sivîlî bombardumanê dewleta tirke de ameyî qetilkerdene. Nê qirkerdişî de taxa Mahmûdîye de 23 sivîlî ameyî qetilkerdene. Şarê Mahmûdîye qirkerdişî ra dima neçare mend ke koçê Şehba bikero.

Serrgêra 4. ya qirkerdişî de Şehba de şarê taxa Mahmûdîye ANFyî rê qisey kerd.

Mustafa Bekîrî da zanayene ke bombarduman de şar yewca de kom bibi la rixmê ney zî dewleta tirke bombardumanî rê dewam kerd. Bekîrî vat: ''Xeylêk kesî birîndar bibî û şehîd bibî. Uca de hêzo leşkerî çinbi. Dîmenê dejinî est bîyî, merdimî parçe-parçe bibî.''

Dara Salmano ke o çax ramitoxê ambulansî bi vat: ''Ma bombardumanî ra nêeşkayêne birîndaran berê nêweşxane. Înan seba ke şarî bidê koçkerdene hêrişê ma kerd. Şarî a roje pê îmkananê xo birîndarî ardî nêweşxane. A roje varan zî varayêne la erdî ra gonîye herikîyayêne. Wexto ke ma resayî taxe ma dî ke merdimî parçe parçe bîyê. Ma xîret kerd ke birîndaran berê nêweşxane ka reyna înan obusî eştî. Ma 8 cenazayî kerdî wesayîtê mi. Ma şehîdî peyê nêweşxaneyî de defin kerdî. Bombardumanî ra ma nêeşkayî înan yewna cayî de defin bikerê.''

Hasan Osmano ke wextê qirkerdişî de resabi hewarê birîndaran vat: ''A roje 16ê adare de dewleta tirke 23 merdimê ma şehîd kerdî. Nêzdîyê bînaya Heyva Sore de mi bi çimanê xo bedenê lete-leteyî dîyî. Dewleta tirke verê çimanê pêro dinya de no qirkerdiş kerd. Nika wextê şerê Ukrayna de dewletê mîyanneteweyî qala heqanê merdiman kenê. La wexto ke dewleta tirke Efrîn îşxal kerdêne ê ça de bîyî? Dewleta tirke Efrînê ma 4 serran de vurna kerd îşkencexane. Ma zanenê ke nê pêro dewletî hê peyê menfaatanê xo de yê. La Şehba de, Heleb û her ca de xoverdayîşê efrînijan do dewam bikero. Ma do Şehba ra fek vera medê. Ma do rêxistinîya xo xurtêr bikerê û Efrînî azad bikerê.''

Mustafa Bekîrî vist vîrî ke hemkarê dewleta tirke ENKS seba ke xoverdayîşê efrînijan bişikno vano 'abigêrê Efrînî' û vat: ''ENKS wina vano, ma zî vanê ke eke Tirkîya û cergê ci uca de bibê, ma senî abigêrê? Ma do abigêrê Efrînê azadbîyayeyî. Seba Efrînê azadî ma do xoverdayîşê xo rê dewam bikerê. Ê do nêeşkê xoverdayîşê ma bişiknê.''