Şingal de 3yê tebaxa 2014î de bi destê DAÎŞî qirkerdişêko pîl ame kerdene. No qirkerdiş xeylêk berhemanê huner û edebîyatî rê bi babete. Nuştox û rojnamegera îtalyane Sara Lucaroni zî fermanî ser o kitabê bi nameyê 'La luce di Singal. Viaggio nel genocidio degli Yazidi' (Roşnîya Şingalî- Raywanîya Ver bi Qirkerdişê Êzidîyan) nuşt. Kitab nêzdî de weşanîya. Sara ANFyî rê qalê kitabê xo kerd.

Sara da zanayene ke Fermanê 3yê Tebaxa 2014î zaf tesîrê aye kerdo. Sara pare kerd ke aye çimdarîyanê xo ra dima verê xo dayo Kurdîstanî. Sara vat: ''Mi şerwanan de, dadîyan de, şarî, cinîyan û şahîdanê qirkerdişî de qisey kerd.''

Sara bale ante ser ke hema zî sûcdarê nê qirkerdişî nêameyê mehkumkerdene û şarê êzidîyan bi nê hawayî teyna ame verdayene. Sara vat: ''Pêro endamê DAÎŞî zîndananê binê kontrolê kurdan de yê û keyeyê înan zî Kampa Holî de yê. Dewletê Rojawanî (Ewropa) endamanê DAÎŞî yê hemwelatîyanê xo nêgênê, muhakeme nêkenê. Şingal de hema zî xeylêk gorê komkîyî est ê, di hezar merdimî vindîbîyaye yê û keyeyê şingalijî koçber ê. Ganî Şingal bibo wayîrê nasnameyêkê cîyayî û statuyî.''

Sara derheqê hêrişanê dewleta tirke yê vera Şingalî de wina vat: ''Tirkîya zaf bitehluke ya. Naye ser o xeylêk senaryoyî yenê kerdene. Tirkîya PKKyî sey dişmenêkî vînena û hêrişê pêro kurdan kena. Şerwanê PKKyî bi binvistişê DAÎŞî wayîrê tesîrî bîyî. Ê warê şerî de û şerî ra dima bi qehremanî têgêrayî. Ê merdimanê ke vera DAÎŞî şer kerd înan rê îxanet ame kerdene. Serebûtê ke nika Kurdîstan de qewimîyenê netîceyanê xirabîyan ê ruhê kolonyalîzmî yê Ewropa yê.''