Êlih de 7 kesê bînî ameyî tepiştene

Êlih de 13 kesê ke çarçeweya operasyonê vera KCDyî de 9 rojî yo  nezaret de yenê tepiştene înan ra 7 kesî ameyî tepiştene.

27ê teşrîna peyêne de Êlih de sereştişanê keyeyan de delegeyê Kongreya Komelê Demokratîkî (KCD), endamê Komeleya Heqanê Merdiman (ÎHD), aktîvîstê Têgêrayîşê Cinîyan ê Azadan (TJA), endam û îdarekarê Meclîsê Mayanê Haştîye û Partîya Demokratîke ya Şaran (HDP)  zî tede 30 kesî ameybî destbendkerdene. Înan ra 12 kesî ameybî tepiştene û 5 kesî bi şertê kontrolê edlîyî serbest ameybî veradayene.

13 sîyasetmedarê ke demê destbendkerdişê înan 4 rojî amebi dergkerdene vizêr vejîyayî mehkema. Mehkema de KCD sey pabesteyê KCK/PKKyî ame hesibnayene û 7 kesî bi îddîaya ‘‘endamîya rêxistina biçeke‘‘ameyî tepiştene. Kesê ke ameyî tepiştene nameyê înan wina yê: Hemvervatoxê KCDyî yê Êlihî Adil Efrin, aktîvîsta TJA Derya Arslan, Kemal Bilir, nuştox Mehmet Faysal Ozdemîr, Yaşar Kirca, Seyithan Mintaş û Şukru Baytar. 5 kesê bînî bi şertê kontrolê edlîyî serbest ameyî veradayene.