Avûkatê Baoryê Îstanbulî û Huqûqnas Feyzî Çelîkî derheqê tecrîdê giranî yê vera Rayberê Şarê Kurdî Abdullah Ocalanî de ANFyî rê qisey kerd.

Feyzî Çelîkî pare kerd ke vera Rayberê Şarê Kurdî huqûqêko taybet yeno caardene û vat: ''Vera Birêz Ocalanî qanûnê taybetî ameyî amadekerdene. Îmrali de rejîmêko taybet yeno caardene, pêvînayîşî yenê qedexekerdene, qiseykerdişê bi kurdkî yeno astengkerdene.  Goreyê nê rejîmî Birêz Ocalan nêeşkeno 3 kesan ra zêdêr kesan bivîno û nêeşkeno heqê xo yê telefonî bişuxilno. Wexto ke merdim ewnîyeno qanûnan û îdarenameyê Îmraliyî vîneno ke tede asta cîyakerîye senî pîl a. Wexto ke cezaya îdamî wedarîyaye cezaya muebeda girane ameye ardene. La na ceza heqê hêvîye destê merdiman ra gêna û vera merdimîye ya.''

Feyzî Çelîkî da zanayene ke mendekerdişê tecrîdê vera Ocalanî sîyasî yo û vat: ''Ocalan kesêko sîyasî yo û sîyasetê pêroyî de wayîrê astêka girîng o. Bi rayîrê tecrîdî vera ney yeno girewtene. Rixmê tecrîdê giranî zî girîngîya Ocalanî ra çîyêk nêkêmîyayo. Fikrê Ocalanî zanîyenê. Oyo tewr girîng zî no yo ke o bê ke angajeyê çewî bibo Îmrali de 23 serrî yo tepişte yo. Ne mulkê ci esto ne zî çewî rê deynê ci esto.

11 mengî yo tira xebere çin a, selahîyetdarê wezîrîye zî eşkerayîye nêdanê. Rewşêka winasêne de zî nîşaneyê seba wedarnayîşê tecrîdî nêasenê. Xora seba ke Ocalan bi rolê xo têbigêro, wedarnayîşê tecrîdî qîm nêkeno. Ganî heqê ci yê asayîşî û azadîyî bêrê caardene. Tecrîdê vera Ocalanî tecrîdê vera kurdan û hêzanê demokratîkan ra cîya nêno ercnayene. Ganî vera tecrîdî têkoşîno demokratîk bêro xurtkerdene.''