Goreyê hûmaranê fermî, rîyê bobelata laserî ra tewr kêmî 76 kesî merdî. Çimeyê cayîyî vanê bi seyan kesî rîyê laserî ra merdî. Yeno vatene ke bobelata laserî 2 mîlyar Euroyî zerar dayo Îranî.
Enstîtuya Tîpê Edlî ya Neteweyîye da zanayene, tewr peynîye de Huzîstano ke başûrê rojawanî de yo de 5 kesî, herêma Îlamî ya Rojakewtena Kurdistanî de kesêkî cuya xo vîndî kerde. Goreyê selahîyetdaran 76 kesî rîyê laserî ra merdî, labelê çimeyê cayîyî vanê bi seyan kesî merdî û bîlançoya raste hetê rejîmî ra yena nimitene.
Huzîstan û Îlam di herêmê ke laserî peynîye de zerar fîşto ra ci. Lasero ke rîyê varanê zêdeyî ra 19’ê Adare de werişto, bi hîrê pêlan da Îranî ro. Rîyê laserî ra bi se hezaran kesê ameyî hewilnayene. Roja Şeme de herêmê rojawanî yê ke bi giranî çol ê, varan vara. Eynî herêman de roja Yewşeme de zî rewşa alarmî dewam kerd.
2 Mîlyar Euro Zerar da Îranî
Goreyê ajansê xeberan ê Îrnayî, Wezrîrê Karanê Zereyî Abdulreza Rahmanî Fazlî roja Yewşeme parlamento de eşkerayîye daye û da zanayene ke, laserî 31 eyaletan ra tesîrê 25 eyaletan kerdo. Wezîr Fazlî ard ziwan, laserî 1.93 ra heta 2.25 mîlyar Euro zerarêk dayo Îranî. Wazîrê Resî û Averşîyayîşê Bajarankî Muhammed Îslamî zî eynî kombîyayîşî de qisey kerd û ard ziwan ke, 14 hezar kîlometreyî ra zêdetir rayîran xesar dîyo û 725 pirdî bi temamî rijîyayê.
