Komeleya Kultur, Hetkarî û Averberdişî ya Gêxî, Dep, Azarpêrt, Xorxol û Çêrme (KAYY-DER) Parka Mimoza ya Beykozê Îstanbulî de Festîvala Boreka Kurdan a 7ine serûber kerde.

Bi kurdkî û tirkî pankartê sey ''KAYY-DER kulturê Gelîya Perî kirişeno ameyoxî'' û ''Çewlîg de ma vera şewat û  talanî xoza û waranê cuyeya xo pawenê'' ameyî daliqnayene. Wekîlê DEM Partî Aytene Kordu, Celal Firat û Faruk Hulaku û îdarekarê bajar û qezayan ê partî, Wekîlê CHPyî yê Amedî Sezgîn Tanrikulu û xeylêk kesî tewrê festîvale bîyî.

 Festîvale bi îkramkerdişê Borega Kurdan ameye destpêkerdene û bi def û zûrnayî govende ameye girewtene û dengbejan klamî vatî. Dima ra Grûba Govande ya Dîlane vejîyaye sehne.

Serekê Komîsyonê Hazirîye yê Festîvale Aziz Enulî bale ante sebebê festîvale ser û vat:  ''Loqmayê ma yê xeyrî yê ke ma sey sîmgeyê bereketî vila kenê, lola binê adirî ya memleketê ma, nîyazê ma loqmaya Xizirî, Borega Kurdan a ke destanê bereketinan ê Rengo Mehmetî ra vejîyaye ewro gastronomî de bîyî sektorêk.''

Enulî vist vîrî ke Mezopotamya de tim zaf kulturîye est a û vat: ''Nê semedî ra ma bedelê giranî dayî. La ma tim raştê zextî  û asîmelkerdişî yenê.  Nimûneyo tewr pîl ê nê Burega Kurdan a ke serê nameyê ci de vatiş û kayê faşîzanî yenê kerdene. Ma sey  kedkaranê Borega Kurdan çirey do destûrê nê medê.

Festîvale bi klamanê hunermendan û govende qedîyaye.