Dewleta tirke ya îşxalkere vera şarê Kurdîstanî semedê polîtîkaya şer û qirkerdişî kerdo xo çeng. Hêrişê îşxalî koyanê Kurdîstanî de tim vila benî. Dewleta tirke ya îşxalkere 16ê nîsana 2024î ra nata Metîna de kena ke hêrişê xo yê îşxalî aver bêro. Endama Konseya Fermandarîye ya YJA Starî Batûfa Çekdar hêrişê îşxalî yê dewleta tirke erjnayî.

Batûfa Çekdar ard ziwan ke dewleta tirke 2019î ra nata seba ke heme herême îşxal bikero xebatê mendeyî dayî destpêkerdene û vat: ''Dişmeno îşxalker vera kurdê azadî û cinîya azade çîyo ke destê ci ra yeno keno. Vera şarê ma tepiştiş, qirkerdiş, îşkence her qeyde hêrişî meşrû vîneno. Ewro Vakurî ra heta Herêmanê Pawitişî yê Medya vera gerîlayan hêrişî yenê kerdene. Tecrîdê Îmraliyî, hêrişê vera şarê ma, polîtîkayê qeyûmî, zextê zîndanan nê pêro papesteyê yewbînan ê. Xakurkê ra heta Heftaninî, Avaşînî ra heta Zap û Metîna 6 serranê peyênan de vera îşxalkeran têkoşîno xurt ame dayene û no têkoşîn hema dewam keno.

Dewleta tirke ya îşxalkere bitaybetî herêma Metîna ser vindena û bêmabên vera ci hêriş kena. Xora nê hêrişî newe nîyê, çar serrî yo nê hêrişî dewam kenê. Têna dewleta tirke hêrişê Metîna nêkena. Tewr zaf Metîna de îşxal û îxanet kewtî têmîyan. Dewleta tirke 2020 bi paştdayîşê PDKyî operasyonê îşxalî da destpêkerdene. 30 serrî yo gerîla tîya de bî û sînorê Başûrê Kurdîstanî û şarê Metîna pawitêne la derdê PDK û keyeyê Barzanî zafkerdişê malûmulkî yo. Yanî semedê pawitişê Başûrê Kurdîstanî çîyêk nêkerd. Herina de pawitişê herra xo de teslîmê îşxalê dewleta tirke kerd. Başûrê Kurdîstanî de bi seyan baregehê leşkerî yê dewleta tirke est ê.

Wa na raştîye bêro zanayene ke Herêmê Pawitişî yê Medya hêzo esas o ke herra Başûrê Kurdîstanî paweno. Bado ke PDKyî rayîrê Metîna fînayî dest dewleta tirke 2021 de qile Zendûra, qilê Koordîne, xeta Qaşûra, qilê Stûna û Azad de leşkerê xo ca kerdî û waşt ver bi qilanê bînan avêr şirê la têkoşînê gerîlayan verê înan girewt. Serkêşîya hemrayanê ma yê xoverdayoxan sey Rêber, Hêjar, Sema, Azê, Nûri, Sozdar, Mardîn, Bager, Hekîm, Cesûr, Rojîn, Roza, Zîlan û Rustemî de  têkoşîn ame kerdene û derbê gidî dîyayî dişmenî ro.

Îşxalê vera Metîna de rolo esas ê dewleta tirke nîyo, yê îxanetê PDKyî yo. PDK hetêkî ra rayîrê heme dekewtiş û vejîyayîşî qefilnayî ke wa gerîlayî meeşkê hareket bikerê û hetê bînî ra waşt verê îmkananê lojîstîk û binawanîyan de bibo asteng. Reyna Parastin û  MÎT zî waşt herême de mîyanê şarî de ajanîye bila bikerê. Bi nê rayîr û metodan derbe dîyayêne gerîlayanê ma ro. Îxanetê PDKyî bi leteyêkê hêrişê îşxalî yê vera Metîna.

Şarê Metîna rê zext yeno kerdene ke warê xo îşxalkeran ro caverdo. La Metîna de tay xayînê ke namûsê xo pê pere roşenê û kesê ke polîtîkaya PDKyî rê xizmet kenê est bê zî şarê Metîna vera  îxanetê PDKyî û îşxalê dewleta tirke de tewiro bianor mojna ra. Vera îşxal û îxanetî tewirê kurdanê azadan ame dayene. Şarê Metîna rixmê heme zextan wayîrê anorê xo vejîyeno. Îşxalkerî û xayînî do vera tewirê kurdan ê bianorî bin bikewê.''