Kongreya Komelê Demokratîke (KCD), Têgêrayîşê Cinîyan ê Azadan (TJA) , Partîya Herêman ê Demokratîkan (DBP), Partîya Demokratîke ya Şaran (HDP) û partîyanê Îtîfaqê Kurdîstanî Buroyê DBPyî de derheqê Qirkerdişê Helebçe de eşkerayîyêke daye.

Eşkerayîye hetê Serekê Partîya Komunîste ya Kurdîstanî Sînan Çîftçîyî ra ameye wendene. Eşkerayîye de ame vîrvistene ke 16ê adara 1988î de Helebçe de 12 hezar kurdî hetê hukmatê Baasî yê Saddam Huseynî ra bi madeyanê kîmyewîyan ameybî qetilkerdene.

Çîftyurekî ard ziwan ke rixmê nê tecrubeyan zî heman hişmendîya qirkere ewro Rojawan û Başûrê Kurdîstanî de pê çekanê kîmyewîyan hêrişanê xo rê dewam kena la vera nê hêrişan kurdî wayîrê destkewteyanê xo vejîyenê.

Eşkerayîye wina dewam kena: ''Seba ke nê destkewteyî bêrê pawitene ganî ma yewîya neteweyîye awan bikerê. Coka ganî partî, dezgeh û rêxistinê kurdan na babete de mesuldarîyanê xo bîyarê ca. Beno ke mabênê ma de hetê fikran ra cîyatîye est biba la ganî yewîya neteweyîye biba armancê ma yê hemparî. Nê prosesî de ke şerê hegemonya beno pîlêr reyna şar beno mexdûr.

Ma Qirkerdişê Helebçe şermezar kenê. Ma do firsend medê ke domanê kurdî reyna bêrê qirkerdene. Nê qirkerdişî ra dima ganî kurdî koyanê Kurdîstanî de nêrgizan pîl bikerê û herinda vengê bombayan de vengê marşê azadîya Kurdîstanî bieşnawê.''