Hemserekanê DEM Partî yê Êlihî Mesut Tekîk û Songule Korkmaz şert û mercê taybetî yê Êlihî û xebatê weçînayîşî ercnayî.

Tekîkî dîyar kerd ke sîyaseto demokratîk bi serkewtişî do bêro tacîdarkerdene û armancê înan azadî û têdûştî ya. Tekîkî vat: ''Bi hawayêkê xozayî ma weçînayîşanê herêmîyan rê xo amade kenê. Ma kenê ke xo biresnê pêro komelî. Goreyê perspektîfê neteweya demokratîke şarê ma yo ereb zî mîyanê partîya ma de xebitîyeno. Ma pêro metodanê teknîk, propaganda û çapemenîye seba ke xo biresnê şarî şuxilnenê. Seba pawitişê sindoqan zî amadekarîyê ma qedîyayî. Ma zanenê ke Êlih sey herêma pîlote ameya weçînayene. Şarê Êlihî zî ney zaneno û bi nê hawayî nêzdîyê babete beno. Wayîrvejîyayîşê şarî roje bi roje beno pîl. Xora Êlih şaristano winayên o ke serranê 1970an ra nata têgêrayîşo welatperwer tede aktîf o.''

Songule Korkmaz ard ziwan ke DEM Partî sîyasetê cuya demokratîke û haştîyane kena û vat: ''Ma çewî sey dişmenî nêvînenê. Êlih bingeyê sîyasetê ma yo û ma do bi têkoşînê xo ney bipawê. Ma sey cinîyanê Êlihî giranîye danê herêmanê weçînayîşan. Cinîyî do îradeyê xo sindoqan de bimojnê. Ma xebatanê xo yê weçînayîşan de zî keye bi keyeyî, taxe bi taxe gêrenê. Ma do biresnê pêro cinîyan. Seba ganîkerdişê perspektîfê xo yê demokratîk, ekolojîk, azadîgîrîya cinîyan ma do têkoşînê xoo hîra bikerê. Ma qerardar ê ke qeyûman bişawê.''